Baramati Crime : बारामती, ता. 17 : बारामती (Baramati) शहर पोलीस ठाण्याच्या हद्दीतील देशमुख चौक परिसरात एका तरुणीचा रस्ता अडवून तिचे अपहरण व मारहाण केल्याप्रकरणी आरोपीला अटक (Arrest) करण्यात आली असून त्याची रवानगी थेट येरवडा (Yerwada) केंद्रीय कारागृहात करण्यात आली आहे. ओंकार अशोक जाधव (रा. हरिकृपानगर, ता. बारामती) असे येरवडा कारागृहात रवानगी करण्यात आलेल्या आरोपीचे नाव आहे. अशी माहिती बारामती शहर पोलीस ठाण्याचे वरिष्ठ पोलीस निरीक्षक श्रीशैल चिवडशेट्टी यांनी दिली.
पोलिसांनी दिलेल्या माहितीनुसार, शनिवारी (ता. 14) सायंकाळी आरोपी ओंकार जाधव याने संबंधित तरुणीची दुचाकी जबरदस्तीने थांबवून तिच्या वाहनाची चावी हिसकावली. त्यानंतर तिला इच्छेविरुद्ध स्वतःच्या घरी नेऊन मारहाण केली, जीवे मारण्याची धमकी दिली तसेच तिच्या सन्मानास धक्का पोहोचविणारे कृत्य केल्याचा आरोप आहे.
घटनेची माहिती मिळताच बारामती शहर पोलीस स्टेशन यांनी तत्काळ गुन्हा दाखल करून आरोपीला अटक केली. न्यायालयासमोर हजर केल्यानंतर प्रथम पोलीस कोठडी मंजूर झाली. पुढील सुनावणीत न्यायालयीन कोठडी सुनावण्यात आली असून आरोपीस येरवडा केंद्रीय कारागृह येथे दाखल करण्यात आले आहे. या प्रकरणी भारतीय न्याय संहिता 2023 अंतर्गत स्त्रीच्या लज्जेस धक्का पोहोचविणे, अपहरण, मारहाण व जीवे मारण्याची धमकी देणे अशा गंभीर कलमान्वये गुन्हा नोंद करण्यात आला आहे.
महिलांविरुद्ध कोणत्याही प्रकारचा गुन्हा सहन केला जाणार नाही, असा स्पष्ट संदेश देत पोलिसांनी नागरिकांना आवाहन केले आहे की, कोणताही त्रास किंवा गुन्हा घडल्यास त्वरित पोलिसांशी संपर्क साधावा. असे आवाहन बारामती शहर पोलीस ठाण्याचे वरिष्ठ पोलीस निरीक्षक श्रीशैल चिवडशेट्टी यांनी दिली.
ही कारवाई पोलीस अधीक्षक संदीप गिल, अपर पोलीस अधीक्षक गणेश बिरादार, उपविभागीय पोलीस अधिकारी डॉ. सुदर्शन राठोड तसेच प्रभारी पोलीस निरीक्षक श्रीशैल चिवडशेट्टी यांच्या मार्गदर्शनाखाली पोलीस हवालदार उदय टापरे यांनी पार पाडली.
