पुणे : पुणे-नगर रस्त्यावरील विमानतळाकडे जाणाऱ्या मार्गावर नागरिकांना मारहाण करून लुटण्याच्या घटना समोर येत आहेत. अशाच एका लूटमारीच्या प्रकरणात येरवडा पोलिसांनी टोळीतील एका आरोपीला अटक केली आहे. तब्बल ४० सीसीटीव्ही कॅमेऱ्यांचे फुटेज तपासल्यानंतर पोलिसांनी आरोपीचा शोध लावला. रेहान अश्रफ शेख (वय १९, रा. कलवड वस्ती, लोहगाव) असे अटक करण्यात आलेल्या तरुणाचे नाव आहे.

९ नोव्हेंबर रोजी रात्री विमानतळाकडे जाणाऱ्या रस्त्यावर एका तरुणाला चोरट्यांनी अडवले. त्याला मारहाण करून आरोपींनी त्याच्याकडील मोबाइल, सोन्याची अंगठी आणि २९ हजार रुपये असा मुद्देमाल लंपास केला होता. या घटनेनंतर संबंधित तरुणाने पोलिसांत तक्रार दाखल केली.
तक्रारीनंतर येरवडा पोलिसांनी या लूटमारीच्या गुन्ह्याचा तपास सुरू केला. परिसरातील तब्बल ४० सीसीटीव्ही कॅमेऱ्यांचे फुटेज बारकाईने तपासण्यात आले. या फुटेजच्या आधारे रेहान अश्रफ शेख याची ओळख पटवून त्याला अटक करण्यात आली.

या टोळीतील इतर साथीदारांचाही शोध पोलिसांकडून सुरू आहे. विमानतळाकडे जाणाऱ्या मार्गावर रात्रीच्या वेळी घडणाऱ्या लूटमारीच्या घटनांमुळे नागरिकांमध्ये भीतीचे वातावरण निर्माण झाले आहे.





