पुणे : येत्या आठवड्यात म्हणजेच 23 ते 29 नोव्हेंबर 2026 दरम्यान बँकांना सलग सुट्ट्या असणार आहेत. त्यामुळे बँकेशी संबंधित काही महत्त्वाची कामे असतील, तर ती वेळेवर उरकून घेणे गरजेचे आहे. देशातील विविध राज्यांमध्ये सण, उत्सव आणि साप्ताहिक सुट्ट्यांमुळे या काळात बँकांचे कामकाज अनेक दिवस बंद राहणार आहे. त्यामुळे शाखेत जाण्यापूर्वी सुट्ट्यांची यादी तपासून घेणे तुमच्यासाठी सोयीचे ठरेल.

बँकांच्या शाखा बंद असल्या तरी ग्राहकांचे व्यवहार पूर्णपणे ठप्प होणार नाहीत. सुट्टीच्या दिवशीही तुम्ही UPI, इंटरनेट बँकिंग, मोबाईल बँकिंग आणि एटीएम (ATM) सेवांचा वापर करून पैशांची देवाणघेवाण करू शकता. परंतु, चेक क्लिअरन्स, रोख रकमेचे मोठे व्यवहार किंवा कागदपत्रे जमा करण्यासारख्या कामांसाठी शाखेत जावे लागते, जी कामे या दिवशी होणार नाहीत.
या आठवड्यातील सुट्ट्यांचा तपशील खालीलप्रमाणे आहे:

24 नोव्हेंबर (मंगळवार): गुरु नानक जयंती, कार्तिक पौर्णिमा आणि रहस पौर्णिमेनिमित्त देशातील अनेक मोठ्या शहरांतील बँका बंद राहतील. यामध्ये मुंबई, नागपूर, नवी दिल्ली, कोलकाता, हैदराबाद, जयपूर, लखनऊ, भोपाळ, चंदीगड, रांची, रायपूर, भुवनेश्वर, शिमला, जम्मू, श्रीनगर, कोहिमा आणि ऐझॉल या शहरांचा समावेश आहे.
28 आणि 29 नोव्हेंबर (शनिवार-रविवार): महिन्याचा चौथा शनिवार असल्याने 28 नोव्हेंबर रोजी संपूर्ण देशभरातील बँकांना सुट्टी असेल. त्यानंतर 29 नोव्हेंबरला रविवारची नियमित साप्ताहिक सुट्टी असल्यामुळे सलग दोन दिवस बँका बंद राहतील.
23 आणि 27 नोव्हेंबर (प्रादेशिक सुट्ट्या): सोमवार, 23 नोव्हेंबर रोजी मेघालयमध्ये ‘सेंग कुट स्नेम’ या स्थानिक उत्सवामुळे शिलाँगसह राज्यातील बँका बंद राहतील. तसेच, शुक्रवार, 27 नोव्हेंबर रोजी कनकदास जयंतीनिमित्त कर्नाटकमध्ये बंगळुरूसह संपूर्ण राज्यात बँकांचे कामकाज बंद राहील. या दोन दिवशी देशातील इतर राज्यांमध्ये मात्र बँका नेहमीप्रमाणे सुरू राहतील.
जर तुमचे बँकेच्या शाखेत जाऊन करण्यासारखे काही काम प्रलंबित असेल, तर आपल्या राज्यातील सुट्ट्या लक्षात घेऊन त्याचे योग्य नियोजन करावे, जेणेकरून ऐनवेळी गैरसोय होणार नाही.






