पुणे: पुणे महानगर परिवहन (Atharva Sudame Controversy) महामंडळाकडून म्हणजेच PMPML कडून रिल्स स्टार इंफ्ल्यूएनसर अथर्व सुदामे याला तिसरी नोटीस बजावण्यात आली आहे. याआधी पीएमपी प्रशासनाने दोन वेळा नोटीस पाठवून त्याला लेखी खुलासा सादर करण्याची संधी दिली होती. मात्र, अथर्व सुदामे याच्याकडून कोणताही प्रतिसाद न मिळाल्याने आता पीएमपी प्रशासनाने आक्रमक भूमिका घेतल्याचे पाहायला मिळत आहे. (Latest Marathi News)
अथर्व सुदामे हा सोशल मीडियावर प्रसिद्ध रिल्स स्टार असून त्याने पीएमपीच्या बसमध्ये कंडक्टरच्या गणवेशात एक रिल तयार केला होता. हा रिल त्याने इन्स्टाग्रामवर शेअर केला होता. संबंधित रिलचा हेतू मनोरंजनाचा असला तरी पीएमपी प्रशासनाच्या मते महामंडळाच्या मालमत्तेचा वापर करताना पूर्वपरवानगी घेणे आवश्यक आहे. परवानगी न घेता बसमध्ये चित्रीकरण करणे, कंडक्टरचा गणवेश, ई-मशिन आणि बॅच बिल्लाचा वापर करणे हा नियमभंग असल्याचे पीएमपीचे म्हणणे आहे.
या रिल्समध्ये प्रवाशांना आक्षेपार्ह आणि अपमानजनक पद्धतीने दाखवण्यात आल्याचा आरोपही पीएमपी प्रशासनाने केला आहे. या प्रकरणी पीएमपीने अथर्व सुदामे याच्यावर 50,000 रुपयांचा दंड ठोठावला आहे. नोटीसमध्ये नमूद करण्यात आले आहे की, 02/01/2026 रोजी पहिली नोटीस बजावून सात दिवसांच्या आत पुणे महानगर परिवहन महामंडळाच्या मुख्य कार्यालयात लेखी खुलासा सादर करण्यास सांगण्यात आले होते. मात्र, ठरलेल्या मुदतीत खुलासा सादर न झाल्याने कारवाई करण्यात आली आहे.
पीएमपी प्रशासनाने दिलेल्या माहितीनुसार, दोन रिल्ससाठी प्रत्येकी 25,000 रुपये याप्रमाणे एकूण 50,000 रुपयांचा दंड आकारण्यात आला आहे. ही रक्कम तातडीने जमा करण्याचे आदेश देण्यात आले असून, दंडाची रक्कम जमा न केल्यास भारतीय दंड संहिता आणि माहिती तंत्रज्ञान कायद्यानुसार एफआयआर दाखल करण्यात येईल, असा इशाराही नोटीसमध्ये देण्यात आला आहे. या प्रकरणानंतर आता अथर्व सुदामे कोणती भूमिका घेतो, दंड भरतो की खुलासा सादर करतो, याकडे सर्वांचे लक्ष लागले आहे.
