पुणे: सोमटणे फाटा परिसरातील (Pune Crime) एका व्हिलामध्ये पार्टीसाठी आलेल्या तरुणांनी (Pimpri-Chinchwad News) गोंधळ घालून व्हिला मालक आणि केअरटेकरला मारहाण केल्याची घटना सोमवारी घडली. या प्रकरणी 12 जणांविरोधात गुन्हा दाखल करण्यात आला असून 9 जणांना पोलिसांनी अटक केली आहे. या घटनेमुळे परिसरात एकच खळबळ उडाली आहे. (Latest Marathi News)
या प्रकरणी गोपाल सुरेंद्र मोरे वय 43, रा. बेव्हर्ली हिल्स, हिंजेवाडी फेज 1, पुणे यांनी शिरगाव पोलीस स्टेशन येथे फिर्याद दाखल केली आहे. पोलिसांनी दिलेल्या माहितीनुसार, आरोपी सोमटणे फाटा येथील एका व्हिलामध्ये पार्टी करण्यासाठी आले होते. पार्टीदरम्यान मोठ्या आवाजात गोंधळ सुरू झाला तसेच आरोपींमध्ये आपसात वाद आणि मारामारी सुरू झाली.
व्हिलामध्ये सुरू असलेला गोंधळ थांबवण्यासाठी व्हिला मालक आणि केअरटेकर तेथे गेले असता आरोपींनी त्यांच्यावरच हल्ला केला. आरोपी आदित्य दत्तात्रय ठाणगे याने फिर्यादी गोपाल मोरे यांना शिवीगाळ करत लाकडी काठीने पाठीत आणि हातावर मारहाण केल्याचा आरोप आहे. इतर आरोपींनी केअरटेकरला लाथाबुक्क्यांनी मारहाण केली तसेच जीवे मारण्याची धमकी दिली. यावेळी व्हिलामधील काही सामानाचे नुकसानही करण्यात आले.
या प्रकरणात आदित्य दत्तात्रय ठाणगे वय 24, ऋतिक सुधाकर वाघमारे वय 21, शुभम दिलीप अहिरवाल वय 25, अनिल गेनभाऊ ढेंगळे वय 25, अनिकेत प्रतापराव वाघेरे वय 24, शंभराज संजय रणदिवे वय 20, गणेश मिठू भड वय 29, प्रणव शंकर कोलते वय 25 आणि संतोष शाम भोसले वय 20 यांना अटक करण्यात आली आहे. उर्वरित 3 आरोपींविरोधात गुन्हा दाखल असून त्यांचा शोध सुरू आहे. या घटनेचा पुढील तपास शिरगाव पोलीस करत आहेत.
