पुणे : पुणे जिल्ह्यातील भोर तालुक्यात जुन्या वादातून एका व्यक्तीवर गोळीबार करण्यात आल्याची घटना समोर आली आहे. नसरापूर-भोर रस्त्यावरील कातुर्डेवाडी येथे मंगळवारी सायंकाळी साडेसहाच्या सुमारास हा प्रकार घडला. या हल्ल्यात विजय मारुती वसले (वय ४७, रा. मालवली, ता. राजगड) यांच्या पाठीत गोळी लागली. घटनेनंतर आरोपी घटनास्थळावरून फरार झाला होता. मात्र, पोलिसांनी अवघ्या आठ तासांत मुख्य आरोपीला अटक केली.
मिळालेल्या माहितीनुसार, जुन्या भांडणाचा राग मनात धरून आरोपीने विजय वसले यांच्यावर गोळीबार केल्याचा आरोप आहे. या हल्ल्यात वसले यांच्या पाठीत गोळी घुसल्याने ते गंभीर जखमी झाले. घटनेनंतर त्यांना तातडीने भोर येथे प्राथमिक उपचार देण्यात आले. त्यानंतर पुढील उपचारांसाठी पुण्यातील ससून रुग्णालयात हलवण्यात आले. ससून रुग्णालयातील डॉक्टरांनी शस्त्रक्रिया करून त्यांच्या पाठीत अडकलेली गोळी बाहेर काढली. सध्या त्यांच्यावर रुग्णालयात उपचार सुरू आहेत.
घटनेचे गांभीर्य लक्षात घेऊन पोलीस अधीक्षक संदीपसिंग गिल यांनी पोलिसांना तातडीने तपास करण्याच्या सूचना दिल्या. त्यानंतर राजगड पोलिसांनी विविध पथके तयार करून आरोपीचा शोध सुरू केला. घटनास्थळावरील सीसीटीव्ही फुटेज आणि गोपनीय खबऱ्यांकडून मिळालेल्या माहितीच्या आधारे पोलिसांनी तपासाला वेग दिला.
या तपासादरम्यान पोलिसांनी मुख्य आरोपी ओंकार बाळू जाधव (रा. मालवली, ता. राजगड) याला घटनेनंतर अवघ्या आठ तासांत अटक केली. आरोपीला पकडण्यासाठी पोलिसांनी केलेल्या वेगवान तपासामुळे त्याचा शोध लवकर लागला.
या गोळीबार प्रकरणी राजगड पोलीस ठाण्यात गुन्हा दाखल करण्यात आला आहे. गोळीबारामागील नेमके कारण, जुन्या वादाचे स्वरूप आणि घटनेशी संबंधित इतर बाबींचा पोलीस तपास करत आहेत. या प्रकरणात पुढील तपास सुरू आहे.
