पुणे: राष्ट्रवादी काँग्रेस (अजित पवार गट)च्या नेत्या रुपाली चाकणकर यांनी सोशल मीडियावर व्हायरल होत असलेल्या एआय (AI) आधारित व्हिडिओंमुळे आपली प्रतिमा मलीन होत असल्याचा दावा करत दिल्ली उच्च न्यायालयात याचिका दाखल केली आहे. या प्रकरणावर शुक्रवारी प्राथमिक सुनावणी झाली असून पुढील सुनावणी २३ जुलै रोजी होणार आहे.
सुनावणीदरम्यान चाकणकर यांच्या वकिलांनी न्यायालयात सांगितले की, अशोक खरात प्रकरणाशी संबंधित अनेक एआय व्हिडिओ सोशल मीडियावर मोठ्या प्रमाणात प्रसारित करण्यात आले आहेत. हे व्हिडिओ विविध राज्यांमध्ये व्हायरल झाले असून त्यांना तब्बल ४३ दशलक्ष (४.३ कोटी) पेक्षा अधिक व्ह्यूज मिळाले आहेत. या व्हिडिओंमुळे रुपाली चाकणकर यांच्या प्रतिष्ठेला धक्का बसत असल्याचा दावा करण्यात आला.
दुसरीकडे, प्रतिवादी पक्षाच्या वकिलांनी संबंधित व्हिडिओंची माहिती किंवा त्यांचे तपशील उपलब्ध नसल्याचे न्यायालयात सांगितले. त्यानंतर चाकणकर यांच्या बाजूने न्यायालयासमोर संबंधित एआय व्हिडिओंबाबत माहिती सादर करण्यात आली.
याचिकेत सोशल मीडियावर प्रसारित करण्यात येणाऱ्या कथित एआय व्हिडिओंमुळे वैयक्तिक आणि सार्वजनिक प्रतिमेचे नुकसान होत असल्याने न्यायालयाने हस्तक्षेप करावा, अशी मागणी करण्यात आली आहे. यावर दिल्ली उच्च न्यायालयाने पुढील सुनावणी २३ जुलै रोजी ठेवली आहे.
अशोक खरात प्रकरण यापूर्वीही चर्चेत आले होते. या प्रकरणात अनेक महिलांच्या लैंगिक शोषणाचे आरोप समोर आले होते. त्यानंतर या प्रकरणाशी संबंधित विविध फोटो, व्हिडिओ आणि इतर सामग्री सोशल मीडियावर मोठ्या प्रमाणात व्हायरल झाली होती. याच पार्श्वभूमीवर रुपाली चाकणकर यांनी न्यायालयात धाव घेतल्याचे सांगितले जात आहे.
