पुणे: पुण्यात कामानिमित्त आलेल्या लातूर जिल्ह्यातील एका प्रवाशाच्या खिशातून गर्दीचा फायदा घेत अज्ञात चोरट्यांनी तब्बल ५० हजार रुपयांची रोकड लंपास केल्याची घटना स्वारगेट परिसरात घडली. बसमध्ये चढताना चोरट्यांनी गर्दीचा फायदा घेत हातचलाखीने पैसे चोरल्याचा संशय आहे.
मिळालेल्या माहितीनुसार, तक्रारदार हे लातूर जिल्ह्यातील अहमदपूरचे रहिवासी असून, शनिवारी (८ ऑगस्ट) कामानिमित्त पुण्यात आले होते. स्वारगेट परिसरात आल्यानंतर त्यांनी पुढील प्रवासासाठी कात्रज ते लोहगाव मार्गावरील पीएमपीएल बस पकडली.
बस प्रवाशांनी खचाखच भरलेली होती. बसमध्ये चढत असताना मोठ्या गर्दीचा फायदा घेत अज्ञात चोरट्यांनी त्यांच्या खिशातून ५० हजार रुपयांची रोकड काढून घेतली. काही वेळाने खिशाला हात लावल्यानंतर पैसे गायब असल्याचे त्यांच्या लक्षात आले. त्यानंतर त्यांनी आजूबाजूला शोध घेतला, मात्र रोकड मिळाली नाही.
आपल्या खिशातून ऐन प्रवासात ५० हजार रुपये चोरीला गेल्याचे लक्षात आल्यानंतर त्यांनी तातडीने स्वारगेट पोलीस ठाणे गाठले. याप्रकरणी त्यांनी पोलिसांकडे तक्रार दाखल केली आहे.
स्वारगेट पोलिसांनी अज्ञात चोरट्यांविरोधात गुन्हा दाखल केला असून, बसस्थानक परिसरातील तसेच संबंधित मार्गावरील सीसीटीव्ही फुटेज तपासण्यास सुरुवात केली आहे. गर्दीच्या ठिकाणी प्रवाशांना लक्ष्य करणाऱ्या चोरट्यांचा शोध घेण्यासाठी पोलिसांकडून तपास सुरू आहे.
