पुणे : राज्यात गेल्या चार पाच दिवसांपासून थंडीचा जोर वाढला आहे. अनेक शहरांमध्ये सध्या १० ते १४ अंश सेल्सिअस दरम्यान तापमान आहे. तर पुणे शहराचे तापमान १४.९ अंशांवर आहे. थंडीच्या कडाक्यामुळे ग्रामीण भागासह शहरी भागात शेकोट्या पेटविल्या जात आहेत. पुढील ४८ तासांत महाराष्ट्रात थंडी वाढणार असल्याचा अंदाज हवामान विभागाने वर्तवला आहे. कडाक्याच्या थंडीमुळे शेतकऱ्यांना रब्बी हंगामात तरी निसर्गाची साथ मिळेल, अशी अपेक्षा आहे.
दरम्यान, हवामान विभागाच्या अंदाजानुसार थंडीचा जोर वर्षअखेरपर्यंत कायम राहणार आहे. अरबी समुद्रात वाऱ्यांची चक्रीय स्थिती निर्माण झाल्यामुळे थंडी पडली आहे. सध्या उत्तरेकडे थंड वारे सुरु असून त्याचा प्रवास राज्याचा दिशेने सुरु झाला आहे. या थंड वाऱ्यांमुळे महाराष्ट्रात गारठा वाढला आहे. थंडी आणण्यासाठी कमी दाबक्षेत्रेही सध्या मध्य प्रदेशसह महाराष्ट्रात अस्तित्वात येत असल्याचे हवामान विभागाने म्हटले आहे.
पुण्याचे तापमान १४.९ अंशांवर
पुणे शहरात सकाळी दाट धुके पडत आहे. थंडीचा प्रभाव वाढत चालला आहे. पुणे शहराचे तापमान १४. ९ अंशांवर आहे. राज्यात सर्वात कमी तापमान विदर्भात नोंदवले गेले. विदर्भ आणि उत्तर महाराष्ट्रात गारठा कायम राहणार आहे. गोंदियाचे तापमान ९ अंश सेल्सियस होते. मुंबईतील तापमान २३.२ अंशावर आले असली तरी सकाळी गार वारे वाहत आहेत. यामुळे समुद्रकिनारी फिरणाऱ्यांची संख्या वाढली आहे. नागपूरचे तापमान १०.६ तर नाशिकचे तापमान १५ अंश सेल्सियस नोंदवण्यात आले.
