Pune : पुण्यात सायबर गुन्ह्यांचे प्रमाण झपाट्याने वाढताना दिसत आहेत. कोथरूड परिसरात एक धक्कादायक घटना घडली आहे. 81 वर्षीय ज्येष्ठ नागरिकाला ‘इलेक्ट्रिक शेगडी’ खरेदीच्या आमिषाने तब्बल 3 लाख 10 हजार रुपयांना गंडा घालण्यात आला आहे. सोशल मीडियावर आकर्षक दरात ‘इलेक्ट्रिक बर्नर’ची जाहिरात पाहून या नागरिकाने दिलेल्या मोबाईल क्रमांकावर संपर्क साधला. सध्या गॅस टंचाईची समस्या जाणवत असल्याने पर्याय म्हणून ही शेगडी उपयोगी ठरेल, असा त्यांचा विचार होता. याच मानसिकतेचा फायदा सायबर गुन्हेगारांनी घेतला.
फोनवरील संभाषणात गुन्हेगारांनी स्वतःला विक्रेते म्हणून विश्वासार्ह भासवलं. “ऑफर मर्यादित आहे” आणि “ताबडतोब पेमेंट करा” अशा दबावाच्या तंत्रांचा वापर करत त्यांनी ऑनलाइन पैसे भरण्याची प्रक्रिया सुरू केली. याच दरम्यान त्यांनी अत्यंत चलाखीने बँक खात्याशी संबंधित गोपनीय माहिती जसे की ओटीपी, कार्ड तपशील मिळवली. काही मिनिटांतच खात्यातून 3,10,000 रुपये दुसऱ्या खात्यात वळवले गेले. व्यवहाराचा मेसेज आल्यानंतरच फसवणूक झाल्याचं लक्षात आलं.
या प्रकरणानंतर पीडित ज्येष्ठ नागरिकाने तातडीने कोथरूड पोलीस ठाण्यात धाव घेतली आणि घडलेला प्रकार अधिकाऱ्यांना सांगितला. प्राथमिक चौकशीनंतर पोलिसांनी अज्ञात सायबर गुन्हेगारांविरुद्ध गुन्हा नोंदवला असून, व्यवहारांची साखळी आणि पैसे कोणत्या खात्यात वळवले गेले याचा मागोवा घेतला जात आहे..
