पुणे, ता. १७ : ज्युपिटर हॉस्पिटल परिसरात अंमली पदार्थ विक्रीसाठी आलेल्या दोन सख्ख्या भावांना बाणेर पोलिसांनी अटक केली होती. या गुन्ह्यातील दोन्ही आरोपींना पुणे जिल्हा व सत्र न्यायालयाने अटी व शर्तींसह ५० हजारांच्या जातमुचलक्यावर जामीन मंजूर केला आहे. अशी माहिती अॅड. सौरव जायभाये यांनी दिली आहे.
अभिषेक भिका बोरसे आणि अक्षय भिका बोरसे अशी जमीन मंजूर करण्यात आलेल्या आरोपींची नावे आहेत.पोलिसांनी दिलेल्या माहितीनुसार, पोलीस निरीक्षक (गुन्हे) अलका सरग यांच्या मार्गदर्शनाखाली बाणेर पोलिसांनी गुप्त माहितीच्या आधारे पीएमसी जलतरण तलावाच्या मागील रस्त्यावर, ज्युपिटर हॉस्पिटलजवळ सापळा रचून कारवाई केली होती. दोन्ही आरोपींना ताब्यात घेऊन त्यांची झडती घेतली असता अभिषेक बोरसे याच्या बॅगेत २.९७० किलो गांजा आढळून आला.
या कारवाईत पोलिसांनी गांजासह दोन मोबाईल फोन, गुन्ह्यात वापरण्यात आलेली हों्डा शाईन मोटारसायकल, विदेशी चलनाच्या नोटा, रोख रक्कम व अन्य कागदपत्रे असा एकूण २ लाख २० हजार ९८० रुपयांचा मुद्देमाल जप्त केला होता. या प्रकरणी बाणेर पोलीस ठाण्यात एनडीपीएस कायद्यातील कलम ८(क), २०(ब)(ii)(ब) आणि २२(ब) अन्वये गुन्हा नोंदविण्यात आला होता. गुन्हा दाखल होताच, पोलिसांनी दोन्ही आरोपींना अटक केली होती.
हा खटला पुणे जिल्हा व सत्र न्यायालयात सुरु होता. या खटल्यात आरोपींनी अॅड. सौरव जायभाये व अॅड. हर्षवर्धन दरेकर यांच्यामार्फत न्यायालयात जामीन अर्ज दाखल केला. गुन्ह्याचा तपास पूर्ण झालेला असून आरोपींची कोणतीही गुन्हेगारी पार्श्वभूमी नसल्याचा युक्तिवाद बचाव पक्षाने केला. दोन्ही बाजूंचा युक्तिवाद ऐकल्यानंतर न्यायालयाने योग्य त्या अटी व शर्तीच्या अधीन राहून आरोपींनी अभिषेक बोरसे आणि अक्षय बोरसे यांना प्रत्येकी ५० हजार रुपयांच्या जातमुचलक्यावर व त्याच रकमेच्या हमीदारासह जामीन मंजूर केला.या खटल्यात कुणाल ढवळे व दिग्विजय काळभोर यांची बहुमुल्य मदत मिळाली.
दरम्यान, न्यायालयाने आरोपींना फिर्यादी किंवा साक्षीदारांशी संपर्क न साधण्याचे निर्देश दिले असून, सुटका झाल्यानंतर सात दिवसांच्या आत कायमस्वरूपी पत्ता व दोन जवळच्या नातेवाईकांची माहिती तपास अधिकाऱ्यांकडे सादर करण्याचे आदेशही दिले आहेत.
