दौंड, (पुणे) : दौंड पोलीस ठाण्याच्या हद्दीतील गांधी चौक येथे खुलेआम रम्मी नावाचा जुगार खेळत असलेल्या अड्ड्यावर दौंड पोलिसांनी छापा टाकून चार जणांना रंगेहाथ पकडले आहे. गुरुवारी (दि. 13) दुपारी 12.20 वाजता एका बंद घराच्या मागे मोकळ्या जागेत हि कारवाई करण्यात आली आहे. या प्रकरणी चौघांवर महाराष्ट्र जुगार कायदा कलम 12 (अ) अन्वये गुन्हा दाखल करण्यात आला आहे.
मुन्ना इकबाल शेख (वय 34, रा. गांधी चौक, दौंड), दत्तात्रय शाम भालेराव (वय 26, रा. इंदिरा नगर, दौंड), शुभम भीमसेन वांभिरे (वय 26, रा. लक्ष्मीनगर, दौंड), आकाश फकीरअप्पा मॅगनकेरी (वय 29, रा. खाटीक गल्लीत, दौंड) अशी गुन्हा दाखल करण्यात आलेल्या चौघांची नावे आहेत.
पोलिसांनी दिलेल्या माहितीनुसार, गांधी चौक येथे एका बंद घराच्या मागे मोकळ्या जागेत काही इसम रम्मी नावाचा जुगार खेळत असल्याची माहिती पोलीस निरीक्षक गोपाळ पवार यांना मिळाली होती. त्यांनी तत्काळ पथक तयार करून छापामारी केली असता चार जणांना रोख पैशांसह पत्त्यांचा डाव खेळताना पकडण्यात आले.
दरम्यान, त्यांच्याकडून 1 हजार 300 रुपये रोख व दोन पत्यांचे कॅट (किंमत 100 रुपये) असा एकूण 1 हजार 400 रुपयांचा मुद्देमाल जप्त करण्यात आला आहे. सदर कारवाई पोलीस हवालदार शेख व त्यांच्या सहकाऱ्यांनी केली. पुढील तपास पोलीस हवालदार पांढरे करीत आहेत.
