लोणी काळभोर, ता. 27 : पुणे महानगर क्षेत्रीय विकास प्राधिकरण (पीएमआरडीए) हद्दीत अनधिकृत होर्डिंग मोठ्या संख्येने आहेत. या अनधिकृत होर्डिंगवर पीएमआरडीएने कारवाईचा बडगा उगारला असून याची सुरवात लोणी काळभोर (ता. हवेली) येथून करण्यात आली आहे. कदमवाकवस्ती येथील दत्तमंदिर व एमआयटी कॉर्नर येथील अनधिकृत होर्डिंगवर पीएमआरडीएच्या अतिक्रमण विभागाने आज मंगळवारी (ता. 27) दुपारी बारा वाजण्यापासून कारवाईला सुरु केली आहे.’
पीएमआरडीएने अनधिकृत होर्डिंग पाडण्यासाठी दोन पथके तयार केली आहेत. ही पथके पुणे-सोलापूर राष्ट्रीय महामार्गाच्या दोन्ही बाजूच्या अनधिकृत होर्डिंग काढत आहे. दोन्ही पथके मंगळवारी (ता. 27) दुपारी बारा वाजण्याच्या सुमारास दत्तमंदिर व एमआयटी कॉर्नर येथील अनधिकृत होर्डिंगच्या ठिकाणी पोहचले आहेत. पथकाकडून दोन क्रेन व गॅस कटरच्या माध्यमातून अनधिकृत होर्डिंग जमिनोदोस्त करण्याचे काम भर पावसात सुरु आहे. यावेळी पीएमआरडीएचे अधिकारी, पदाधिकारी, व लोणी काळभोर पोलिसांचा मोठा फौजफाटा उपस्थित होता.
View this post on Instagram
पुणे-सोलापूर राष्ट्रीय महामार्गावरील कवडीपाट टोलनाका ते पाटस टोलनाका या दरम्यान असलेल्या पीएमआरडीएच्या अधिकारक्षेत्रात असलेल्या अनधिकृत फ्लेक्स व होर्डिंगवर कारवाई करण्यात येणार आहे. या दरम्यान, 150 हून अधिक अनधिकृत होर्डिंग असून केवळ 5 ते 6 जणांचे अधिकृत होर्डिंग आहेत. अधिकृत होर्डिंग वगळता सर्व बेकायदा होर्डिंग संत तुकाराम पालखी सोहळ्याच्या अगोदर काढून रस्ता चकाचक करण्यात येणार आहे. अशी माहिती पीएमआरडीएकडून मिळत आहेत.
दरम्यान, पीएमआरडीएने अनधिकृत होर्डिंग पाडण्याचे काम एका कंपनीला दिले आहे. ही कंपनी अनधिकृत होर्डिंग पाडत आहे. अनधिकृत होर्डिंग पडल्यानंतर सर्व लोखंड व साहित्य गोळा करून घेऊन जात आहे. येणाऱ्या रकमेतून 35 टक्के रक्कम प्रशासनाकडे जमा करीत आहेत. यामुळे कोणताही पैसा खर्च न करता यामध्ये सुद्धा प्रशासनाचा आर्थिक फायदा होत आहे.
‘या’ अनधिकृत होर्डिंगवर निघणार?
थेऊरफाटा, कुंजीरवाडी, नायगाव फाटा, सोरतापवाडी व उरुळी कांचन येथील एललाईट चौक, तळवडी चौक, यवत, चौफुला, वरवंड व पाटस या ठिकाणी अनेक अधिक अनधिकृत होर्डिंग आहेत. हे सर्व होर्डिंग लोकवस्तीत असून जागा मालक व चालकाने धोकादायकरीत्या उभारले आहेत. त्यामुळे रस्त्यावरून ये-जा करणारे पादचारी व वाहनचालक यांच्या जीवाला मोठा धोका निर्माण झाला आहे. मात्र हे जागामालक राजकीय क्षेत्रातील असून त्यांचे मोठ मोठ्या पक्ष्यांच्या नेत्याशी घनिष्ठ संबंध आहेत. त्यामुळे त्याच्याही अनधिकृत होर्डिंगवर कारवाई होणार का? खरंच ‘या’ अनधिकृत होर्डिंग निघणार? असा सवाल स्थानिक नागरिकांनी उपस्थित केला आहे.
