पिंपरी-चिंचवड : शहरातील पिंपळे गुरव परिसरात एक धक्कादायक घटना समोर आली आहे. रस्त्याच्या कडेला कचऱ्यात टाकलेल्या पोत्यात पुरुषाचे दोन्ही पाय आढळल्याने परिसरात खळबळ उडाली आहे. हे पाय गुडघ्याखालील भागापासून वेगळे केलेल्या अवस्थेत असल्याचे प्राथमिक माहितीतून समोर आले आहे. या घटनेमुळे नागरिकांमध्ये भीतीचे वातावरण निर्माण झाले आहे.
मिळालेल्या माहितीनुसार, शुक्रवारी सकाळी सुमारे ११ वाजण्याच्या सुमारास कृष्णा लोट आणि ओंकार काळे हे परिसरात कचरा गोळा करण्यासाठी आले होते. त्यावेळी रस्त्याच्या कडेला पडलेल्या एका पोत्यावर त्यांना रक्ताचे डाग दिसले. त्यामुळे त्यांना संशय आला.
सुरुवातीला पोत्यात एखाद्या प्राण्याचे अवयव असावेत, असे त्यांना वाटले. मात्र, पोते उघडून पाहिल्यानंतर त्यात मानवी अवयव असल्याचे त्यांच्या लक्षात आले. त्यांनी तातडीने या घटनेची माहिती पोलिसांना दिली.
घटनेची माहिती मिळताच सांगवी पोलीस घटनास्थळी दाखल झाले. पोलीस उपायुक्त संदीप आटोळे, सहाय्यक पोलीस आयुक्त मनीषा कदम, वरिष्ठ पोलीस निरीक्षक जितेंद्र कोळी यांच्यासह गुन्हे शाखेचे पथकही घटनास्थळी पोहोचले.
आढळलेले अवयव नेमके कोणाचे आहेत, संबंधित व्यक्तीबाबत काही गुन्हा घडला आहे का आणि हे अवयव पोत्यात भरून रस्त्याच्या कडेला कोणी टाकले, याचा तपास पोलिसांकडून सुरू आहे.
या घटनेमागे नेमके काय कारण आहे, हे अद्याप स्पष्ट झालेले नाही. मानवी अवयवांची ओळख पटवणे आणि घटनेचा उलगडा करण्यासाठी सांगवी पोलीस तपास करत आहेत. वर्दळीच्या परिसरात हा प्रकार उघडकीस आल्याने नागरिकांमध्ये चिंतेचे वातावरण आहे.
