अक्षय टेमगिरे
शिरूर : शिरूर शहरात अंमली पदार्थांची अवैध विक्री आणि तस्करी करणाऱ्यांविरोधात शिरूर पोलिसांनी मोठी कारवाई केली असून शिरूर मार्केट यार्डच्या मागील बाजूस असलेल्या साईनगर परिसरात गुरुवारी दि. ५ नोव्हेंबर रोजी रात्री साडेदहा वाजण्याच्या सुमारास छापा टाकून गांजा विक्री करणाऱ्या दोघांना पोलिसांनी अटक केली असून या कारवाईत तब्बल २ किलो ४१४ ग्रॅम गांजासह दोन आयफोन, एक वनप्लस मोबाईल, दुचाकी आणि इतर साहित्य असा एकूण २ लाख ७१ हजार रुपयांचा मुद्देमाल जप्त करण्यात आला आहे.
या प्रकरणातील मुख्य आरोपी आशुतोष मिलिंद काळे हा फरार झाला असून पोलीस त्याचा शोध घेत आहेत. उत्कर्ष जालिंदर ढेरे वय २१, रा. बाभुळसर खुर्द, ता. शिरूर आणि साई संतोष ससाणे वय २०, रा. हुडको कॉलनी, शिरूर अशी अटक करण्यात आलेल्या आरोपींची नावे आहेत. तर आशुतोष मिलिंद काळे रा. साईनगर, शिरूर हा या प्रकरणातील मुख्य आरोपी असल्याचे तपासात समोर आले आहे.
पोलिसांनी दिलेल्या माहितीनुसार, आशुतोष काळे याने गांजा आपल्या राहत्या घरात साठवून ठेवला होता.
तसेच विक्रीसाठी त्यातील काही गांजा उत्कर्ष ढेरे आणि साई ससाणे यांच्याकडे दिला होता. त्यानुसार पोलिसांनी साईनगर परिसरात कारवाई करत दोघांना ताब्यात घेतले असून तपासादरम्यान आशुतोष काळे याच्या घरातून १ किलो ८०९ ग्रॅम, उत्कर्ष ढेरे याच्याकडून १२२ ग्रॅम, साई ससाणे याच्याकडून ८० ग्रॅम, तर अॅक्टिव्हा मोटारसायकलच्या डिक्कीतून ४०३ ग्रॅम गांजा जप्त करण्यात आला आहे.
याशिवाय गांजा पॅकिंगसाठी वापरण्यात येणाऱ्या ९९ रिकाम्या प्लास्टिक पिशव्या, वजनकाटा, दोन आयफोन आणि एक वनप्लस मोबाईलही पोलिसांनी जप्त केला आहे. या कारवाईत एकूण २ किलो ४१४ ग्रॅम गांजा आणि इतर साहित्य असा २ लाख ७१ हजार रुपयांचा मुद्देमाल हस्तगत करण्यात आला असून.
या प्रकरणी शिरूर पोलीस स्टेशनमध्ये विविध कलमान्वये गुन्हा दाखल करण्यात आला आहे.
अटक केलेल्या दोघांची चौकशी सुरू असून, फरार मुख्य आरोपी आशुतोष काळे याला पकडण्यासाठी पोलिसांकडून शोधमोहीम सुरू असून
ही कारवाई शिरूर पोलीस स्टेशनचे प्रभारी अधिकारी पोलीस निरीक्षक विनोद पाटील, सहाय्यक पोलीस निरीक्षक शिवाजीराव भोसले व त्यांच्या पथकाने केली असून.
या गुन्ह्यात पोलीस कॉन्स्टेबल ए. एस. माने यांनी फिर्याद दिली असून पुढील तपास सहाय्यक पोलीस निरीक्षक टेंगले करीत आहेत.
अंमली पदार्थांची विक्री, वाहतूक आणि साठवणूक करणाऱ्यांविरुद्ध यापुढेही कठोर कारवाई करण्यात येणार असून अशा अवैध व्यवसायांची माहिती नागरिकांनी पोलिसांना द्यावी, असे आवाहन शिरूर पोलिसांनी केले आहे.
