पिंपरी-चिंचवड,(पुणे): चिखली पोलीस ठाण्याच्या हद्दीतून दोन अल्पवयीन मुलींना फूस लावून पळवून नेलेल्या दोन आरोपींना चिखली पोलीसांच्या गुन्हे शोध पथकाने (डिटेक्टिव्ह ब्रँच) अटक केली आहे. विशाल प्रभाकर समुखराय (वय – 19, मुळ रा. मु.पो. म्हाळंग्रा, ता. चाकूर, जि. लातुर) व विशाल राजु कांबळे (वय 19, रा. पायगुडेनगर, सुसगाव, ता. हवेली) अशी अटक करण्यात आलेल्या आरोपींची नावे आहेत.
पोलिसांनी दिलेल्या माहितीनुसार, 19 मे ला चिखली पोलीस ठाण्याच्या हद्दीतून दोन अल्पवयीन मुलींना पळवून नेल्याची घटना घडली होती. त्याबाबत चिखली पोलीस ठाण्यात दोन गुन्हे दाखल करण्यात आले होते. एकाच दिवशी दोन अल्पवयीन मुलींना पळवून नेल्याची घटना गंभीर असल्याने वरिष्ठांनी दोन्ही मुलींचा शोध घेण्याबाबत सुचना गुन्हे शोध पथकाला दिल्या होत्या.
पोलिसांच्या तपासात दोन्ही अल्पवयीन मुली या मैत्रिणी असल्याचे लक्षात आल्यानंतर त्यांना एकत्रितरित्या कोणीतरी फुस लावुन पळवून नेले असण्याचा संशय बळावला. त्यादृष्टीने सर्व माहीती घेवून तांत्रीक विश्लेषण करुन यातील अल्पवयीन मुली व आरोपी हे वाशीम जिल्ह्यात असल्याची माहिती पोलिसांना मिळाली. त्यानुसार मंगळवारी (ता.27) आरोपींचा कौशल्यपूर्वक तपास करुन वरील दोन्ही आरोपींना ताब्यात घेण्यात आले. तसेच त्यांच्या ताब्यातुन दोन अल्पवयीन मुलींची सुटका केली आहे.
मंगळवारी तपास पथक चिखली पोलीस ठाण्याच्या हद्दीत गस्त घालीत असताना पोलीस हवालदार कबीर पिंजारी यांना एक इसम चोरीचे मोबाईल फोन विकण्यासाठी आला आहे. अशी गोपनीय माहिती मिळाली होती. मिळालेल्या माहितीच्या अनुषंगाने पोलीस पथक यांनी दिगंबर सुनिल साळुंके वय -20, रा. वैष्णवी ओरान्स, बी/703, रिव्हर रेसीडेन्सी रोड, जाधववाडी, चिखली), याला सापळा रचून ताब्यात घेतले.
त्याच्याकडे मिळून आलेल्या मोबाईल बाबत चौकशी केली असता त्याने तुकाईमाता मंदीराजवळ, बाणेर पुणे या ठिकाणी त्याचे साथीदार विशाल राजु कांबळे व विशाल प्रभाकर समुखराव असे तिघांनी मिळून एका परदेशी इसमास अडवुन जबरदस्तीने त्याचा मोबाईल काढून घेतला. त्यानंतर तेथून हंक मोटारसायकलवरुन पळून आणल्याची माहिती दिली. तसेच सदरचा सॅमसंग कंपनीचा एस 24 मोबाईल हा त्याच परदेशी इसमाचा असल्याची कबुली पोलिसांना दिली.
दरम्यान, अरोपीच्या ताब्यातून 72 हजार रुपये किंमतीचा सॅमसंग मोबाईल फोन, एक व्हिडीओ कंपनीचा फोन व गुन्हा केल्यानंतर पळून जाण्यासाठी वापरलेली हंक मोटारसायकल असा 1 लाख 37 हजार रुपयांचा मुद्देमाल जप्त करण्यात आला आहे. आरोपी दिगंबर साळुंके याला पुढील तपासासाठी बाणेर पोलिसांच्या ताब्यात देण्यात आलेले आहे.
सदरची कामगिरी, चिखली पोलीस ठाण्याचे वरिष्ठ पोलीस निरीक्षक विठ्ठल साळुंखे, अमोल फडतरे, पोलीस निरीक्षक (गुन्हे), यांच्या मार्गदर्शनाखाली सहायक पोलीस निरीक्षक राम गोमारे, पोलीस उपनिरीक्षक लक्ष्मण मोगले, सहायक फौजदार राजु जाधव, पोलीस हवालदार अरुण साबळे, कबीर पिंजारी, सुरज सुतार, भास्कर तारळकर, बाबासाहेब गर्जे, मच्छिद्र भांबुरे, राजेश गोडांबे, पोलीस शिपाई नारायण सोमवंशी, संतोष भोर यांनी केली आहे.
