पुणे : पुण्यातील वैष्णवी हगवणे प्रकरणानंतर पुन्हा एकदा पिंपरी-चिंचवड परिसरात विवाहितेच्या संशयास्पद मृत्यूने खळबळ उडाली आहे. वाकड परिसरात राहणाऱ्या शिल्पा गवारे-कलाटे यांनी रक्षाबंधनच्या पूर्वसंध्येला जीवन संपवल्याची घटना समोर आली. शिल्पाच्या मृत्यूप्रकरणी तिच्या पतीसह सासू-सासरे आणि दिराविरोधात गुन्हा दाखल करण्यात आला आहे. दरम्यान, शिल्पाच्या आई-वडिलांनी सासरच्या मंडळींवर गंभीर आरोप केले आहेत.
शिल्पा यांचा सचिन गवारे यांच्यासोबत २००९ मध्ये मोठ्या थाटामाटात विवाह झाला होता. मात्र, लग्नानंतर लगेचच कुटुंबीयांना सचिन यांच्याबाबत धक्कादायक माहिती समजल्याचा दावा शिल्पाच्या आई-वडिलांनी केला. सचिन एका खून प्रकरणात मुख्य आरोपी असल्याने फरार झाल्याचे त्यांना समजले होते. मात्र, लग्न मोडण्यापेक्षा मुलगी सासरीच राहावी, असा निर्णय त्यांनी घेतला. याच निर्णयाचा आज पश्चात्ताप होत असल्याचे कुटुंबीयांनी सांगितले.
शिल्पाचे वडील गुलाब कलाटे यांनी सासरच्या मंडळींवर संपत्तीच्या हव्यासाचा आरोप केला आहे. त्यांच्या म्हणण्यानुसार, शिल्पाच्या सासऱ्याने आपल्या सासरच्या मालमत्तेवर हक्क मिळवला होता आणि आपल्या मुलांनाही त्याच पद्धतीने वागण्याचे शिकवले. दोघेही बाप-लेक दारू पित असल्याचाही आरोप त्यांनी केला. आरोपींना कठोरात कठोर शिक्षा झाली पाहिजे, अशी मागणी त्यांनी केली आहे.
शिल्पाच्या आई रतन कलाटे यांनीही मुलीच्या शेवटच्या दिवसांबाबत माहिती दिली. घटनेच्या आदल्या दिवशी शिल्पा कपडे बदलण्यासाठी माहेरी आली होती. गाडीत बसताना तिने आई-वडिलांकडे हात केला. त्यानंतर ती घरी का थांबली नाही, असे विचारले असता घरी स्वयंपाक करायचा असून लहान मूल घरी असल्याचे तिने सांगितले होते. रात्री साडेअकराच्या सुमारास पुन्हा पती-पत्नीमध्ये वाद झाल्याचा फोन आल्याचे रतन कलाटे यांनी सांगितले.
शिल्पाला पतीकडून मारहाण होत असल्याचेही आईने सांगितले. तिच्या डोक्यात इस्त्री मारणे आणि शरीराला चटके देणे असे प्रकार होत असल्याचा आरोप त्यांनी केला. मात्र, शिल्पाने याबाबत कधीही स्पष्टपणे सांगितले नव्हते. ती दुखापतीचे कारण पातेलं किंवा कुकर लागल्याचे सांगत असल्याने कुटुंबीयांना परिस्थितीची पूर्ण कल्पना आली नाही. अलीकडेच तिने काही गोष्टी सांगण्यास सुरुवात केली होती, असेही आईने म्हटले.
दरम्यान, या प्रकरणात पती सचिन गवारे, सासू-सासरे आणि दिराविरोधात कठोर कलमांनुसार गुन्हा दाखल करण्यात आला आहे. शिल्पाचा मृत्यू संशयास्पद असल्याने शवविच्छेदनादरम्यान व्हिसेरा राखून ठेवण्यात आला आहे. त्यामुळे मृत्यूचे नेमके कारण आणि या प्रकरणातील आरोपांची सत्यता पुढील तपासात स्पष्ट होणार आहे.
