Pune News: पिंपरी-चिंचवड : पिंपरी-चिंचवड शहरात सायबर फसवणुकीचा (Cyber Fraud) आणखी एक गंभीर प्रकार समोर आला असून,एका ज्येष्ठ नागरिकाची तब्बल 1 कोटी रुपयांची आर्थिक फसवणूक करण्यात आली आहे. सायबर चोरांनी स्वतःला केंद्रीय अन्वेषण विभागाचे अधिकारी असल्याचे भासवून भीती निर्माण केली आणि वेगवेगळ्या कारणांचा आधार घेऊन मोठी रक्कम उकळली. या प्रकरणामुळे शहरातील ज्येष्ठ नागरिकांमध्ये भीतीचे वातावरण पसरले आहे.
चिंचवडमधील शिवाजी पार्क परिसरात राहणारे 77 वर्षीय नागरिक या फसवणुकीचे बळी ठरले आहेत. 30 डिसेंबर 2025 ते 14 जानेवारी 2026 या कालावधीत ही घटना घडली. अज्ञात व्यक्तींनी फोन करून आपण दूरसंचार विभाग, निरीक्षण अधिकारी तसेच सीबीआय अधिकारी असल्याचा दावा केला. अंमलबजावणी संचालनालयाने उघड केलेल्या मनी लाँड्रिंग प्रकरणात तक्रारदाराचे नाव आल्याचे सांगून त्यांना घाबरवण्यात आले.
फोन करणाऱ्यांनी तक्रारदाराला त्यांच्या बँक खात्यातील व्यवहार संशयास्पद असल्याचे सांगितले. खाते तपासणीसाठी सहकार्य न केल्यास डिजिटल पद्धतीने अटक केली जाईल, अशी धमकी देण्यात आली. या भीतीपोटी ज्येष्ठ नागरिकाने वेळोवेळी वेगवेगळ्या खात्यांमध्ये मोठी रक्कम वर्ग केली. काही दिवसांतच एकूण 1 कोटी रुपयांची फसवणूक झाल्याचे त्यांच्या लक्षात आले.
फसवणूक झाल्याचे समजताच संबंधित नागरिकाने पिंपरी-चिंचवड सायबर पोलिस ठाण्यात तक्रार दाखल केली. पोलिसांनी तातडीने गुन्हा नोंदवून तपास सुरू केला आहे. विविध फोन नंबरच्या माध्यमातून संपर्क साधण्यात आल्याचे निष्पन्न झाले असून, संबंधित अज्ञात व्यक्तींविरोधात भारतीय न्याय संहिता 2023 आणि माहिती तंत्रज्ञान कायदा 2000 अंतर्गत गुन्हा दाखल करण्यात आला आहे.
सायबर पोलिसांकडून या प्रकरणाचा सखोल तपास सुरू असून, नागरिकांनी अशा प्रकारच्या फोन कॉल्सना बळी पडू नये, कोणतीही वैयक्तिक किंवा आर्थिक माहिती फोनवरून देऊ नये, असे आवाहन पोलिसांनी केले आहे.
