लोणी काळभोर, (पुणे) : गेल्या काही दिवसांपासून पावसाने ताण दिल्याने आणि उकाड्याने नागरिक त्रस्त झालेले असतानाच, मंगळवारी (ता. 22) दुपारपासून लोणी काळभोर, उरुळी कांचनसह पूर्व हवेली परिसरात पावसाने जोरदार हजेरी लावली. विजांच्या कडकडाटासह झालेल्या या मुसळधार पावसामुळे सुकत चाललेल्या पिकांना मोठे जीवनदान मिळाले असून, शेतकरी वर्ग पूर्णपणे सुखावला आहे. उरुळी कांचन, सोरतापवाडी, लोणी काळभोर, थेऊर, आळंदी म्हातोबा, कोरेगाव मूळ व अष्टापूर परिसरात सर्वत्र पावसाच्या सरी कोसळल्या.
या वर्षी पावसाने सुरुवातीला हलका ते मध्यम स्वरूपाचा पाउस झाला होता. मात्र, गेल्या काही दिवसांपासून उन्हाचा तडाखा वाढला होता. त्यामुळे ऊस, तरकारी (भाजीपाला), मका आणि चारा पिके सुकू लागली होती. पाण्याच्या टंचाईमुळे शेतकरी चिंतेत सापडला होता. मात्र, मंगळवारी झालेल्या मुसळधार पावसामुळे शेतांमध्ये पाणी साचले असून, पिकांना मोठी नवसंजीवनी मिळाली आहे. या पावसामुळे विहिरी व कूपनलिकांच्या (बोअरवेल) पाणीपातळीत वाढ होण्यास मदत होणार असल्याने शेतकऱ्यांच्या चेहऱ्यावर आनंदाचे वातावरण पाहायला मिळत आहे.
अचानक आलेल्या या मुसळधार पावसामुळे लोणी काळभोर, उरुळी कांचनसह परिसरातील गावातील अंतर्गत रस्ते व मुख्य चौक परिसरात पावसाचे पाणी साचले होते. महामार्गावरून जाणाऱ्या वाहनधारकांची काही काळ धांदल उडाली. मात्र, गेल्या अनेक दिवसांपासून असह्य उकाड्याने हैराण झालेल्या ग्रामस्थांना आणि चाकरमान्यांना पावसाच्या आगमनामुळे वातावरणात निर्माण झालेल्या गारव्याने मोठा दिलासा मिळाला आहे.
दरम्यान, “गेल्या काही दिवसांपासून पावसाची अत्यंत गरज होती. हा पाऊस वेळेवर आल्याने उसाच्या आणि भाजीपाल्याच्या पिकांना मोठा फायदा होणार आहे. या पावसामुळे शेतातील कामांना वेग येईल,” अशी प्रतिक्रिया शेतकरी संभाजी कांचन यांच्यासह शेतकऱ्यांनी व्यक्त केली आहे.
