पिंपरी-चिंचवड: पिंपरी-चिंचवड पोलिसांच्या आर्थिक गुन्हे शाखेने गुंतवणुकीच्या नावाखाली कोट्यवधी रुपयांची फसवणूक करणाऱ्या एकाच कुटुंबातील चार जणांना अटक केली आहे. शेअर बाजार आणि भिशी यामध्ये गुंतवणूक केल्यास दरमहा आकर्षक परतावा मिळेल, असे सांगून अनेक गुंतवणूकदारांची फसवणूक करण्यात आल्याचा आरोप आहे.
अटक करण्यात आलेल्यांमध्ये रमेश आहेरकर, त्यांची पत्नी छाया आहेरकर तसेच त्यांचे दोन्ही मुलगे वेदांत आणि आदित्य आहेरकर यांचा समावेश आहे. हे कुटुंब माण परिसरात राहत होते. गुंतवणूकदारांचा विश्वास संपादन करण्यासाठी त्यांनी विविध नावांनी कंपन्या सुरू केल्या होत्या. या कंपन्यांच्या माध्यमातून पैसे गुंतवल्यास दरमहा 4 ते 5 टक्के परतावा देण्याचे आश्वासन दिले जात होते.
या आश्वासनांवर विश्वास ठेवून अनेकांनी मोठ्या प्रमाणात पैसे गुंतवले. मात्र, ठरल्याप्रमाणे परतावा मिळाला नाही. तसेच मूळ रक्कमही परत न मिळाल्याने गुंतवणूकदारांना संशय आला. तपासात 11 गुंतवणूकदारांची एकूण 5 कोटींपेक्षा अधिक रकमेची फसवणूक झाल्याचे समोर आले.
याप्रकरणी हिंजवडी पोलीस ठाण्यात तक्रार दाखल झाल्यानंतर आरोपींना याची माहिती मिळाली. त्यानंतर त्यांनी आपले घर बंद करून परिसरातून पलायन केले. मात्र, आर्थिक गुन्हे शाखेच्या पथकाने तांत्रिक माहिती आणि गुप्त तपासाच्या मदतीने त्यांचा शोध घेतला. अखेर नेवासा परिसरातून या चौघांना ताब्यात घेण्यात आले.
पोलिसांनी आरोपींशी संबंधित अनेक बँक खाती गोठवली असून त्यांच्या आर्थिक व्यवहारांची चौकशी सुरू आहे. फसवणुकीतून मिळालेल्या पैशांचा वापर कुठे करण्यात आला आणि त्यातून कोणती मालमत्ता खरेदी करण्यात आली का, याचाही तपास केला जात आहे. न्यायालयाने आरोपींना पोलीस कोठडी सुनावली असून पुढील तपास सुरू आहे.
