प्रतिनिधी अमित मुंडीक
Pune Crime: पिंपरी-चिंचवड : परिचारीकेच्या नावावर बनावट बँक खाते उघडून त्या खात्यामधून सायबर गुन्हे करत करोड़ोंची आर्थिक हेराफेरी करणाऱ्या तीन जणांना पिंपरी-चिंचवड सायबर (Cyber) पोलिसांनी सांगली, मुंबई आणि अहमदाबाद विमानतळावरून अटक केली आहे. या गुन्ह्याचा मास्टरमाइंड क्रिप्टोकरन्सीद्वारे व्यवहार करून सतत ठिकाण बदलत होता. अखेर तांत्रिक विश्लेषणाच्या आधारे ही मोठी कारवाई करण्यात आली. Pune Crime News
गुन्हा क्रमांक 42/2025 अंतर्गत फिर्यादी यांना टेलीग्राम वरील 85 SC India Stock Circle या ग्रुपमधून शेअर ट्रेडिंगमध्ये जास्त नफा मिळवून देण्याचे आमिष दाखवून तब्बल 2,10,04,794/- रुपयांची फसवणूक करण्यात आली. अॅडमिन Lata Gupta @GGPPLU2 व इतर हँडल्समार्फत विविध लिंक पाठवून पैसे ट्रान्सफर करण्यास भाग पाडण्यात आले.
तपासादरम्यान फिर्यादींच्या पैशांपैकी 78 लाख रुपये सारस्वत बँक खात्यामध्ये जमा झाल्याचे निष्पन्न झाले. हे खाते सांगली येथील पूनम रफिक शिकलगार हिच्या नावे असल्याचे आढळले. प्राथमिक चौकशीत तिने खाते आपले नसल्याचे सांगितले; परंतु कसून तपासात तिने हे खाते तिच्या मित्र मोहम्मद सईद मोहिउद्दीन पटेल (रा. सांगली) याला दिल्याची कबुली दिली.
मोहम्मद सईदने हे खाते समर गुप्ता याला 12लाख रुपये रोख रकमेच्या व्यवहारात दिल्याची माहिती मिळाली. पुढील तपासात समर गुप्ता हे नाव खोटे असून त्याचे खरे नाव विशाल दिनेश ठक्कर (रा. ठाणे) असल्याचे समोर आले. विशाल ठक्कर हा क्रिप्टोकरन्सीमार्फत (Binance USDT) व्यवहार करून खात्यांचा वापर करत असल्याचे स्पष्ट झाले.
विशाल ठक्करच्या माध्यमातून तपास मास्टरमाइंड फॉर्च्युन पर्यंत पोहोचला. तो वाराणसीहून अहमदाबादला विमानाने येत असल्याची माहिती मिळाल्यानंतर सायबर पोलिसांनी अहमदाबाद विमानतळावर सापळा रचून त्याला ताब्यात घेतले. चौकशीत त्याचे खरे नाव हर्ष सुरेंद्रप्रताप भदोरिया (रा. कानपूर, उत्तर प्रदेश) असल्याचे समोर आले. देशभरातील किमान 26 नागरिकांची करोडो रुपयांची फसवणूक केल्याचे प्रथमदर्शनी निष्पन्न झाले आहे.
अटक करण्यात आलेल्या आरोपींची नावे समोर आली आहे. मोहम्मद सईद मोहिउद्दीन पटेल ( वय25), रा. सांगली, विशाल दिनेश ठक्कर उर्फ समर गुप्ता, वय (28), रा. ठाणे, हर्ष सुरेंद्रप्रताप भदोरिया उर्फ फॉर्च्युन, वय (32), रा. कानपूर अशी आरोपींची ओळख आहे. आरोपींकडून एकूण 6 मोबाईल फोन जप्त करण्यात आले असून ₹39,62,315/- रुपये होल्ड करण्यात आले आहेत.
ही कारवाई मा. पोलीस आयुक्त विनय कुमार चौबे यांच्या मार्गदर्शनाखाली, तसेच वरिष्ठ अधिकाऱ्यांच्या देखरेखीखाली पोलीस निरीक्षक रविकिरण नाळे व सायबर पोलीस पथकाने केली. न्यायालयीन प्रक्रियेत सरकारी अभियोक्ता सुरत मोहिते यांनी सहकार्य केले.
सायबर पोलिसांच्या तात्काळ व कौशल्यपूर्ण कारवाईमुळे या मोठ्या फसवणूक रॅकेटचा पर्दाफाश झाला असून पुढील तपास सुरू आहे.
