पिंपरी : पिंपरी मधून एक धक्कादायक बातमी समोर आली आहे. वारंवार मागणी करूनही पतीने नवीन मोबाईल घेऊन न दिल्याने पत्नीने राहत्या घरात गळफास घेऊन आत्महत्या केली आहे. ही घटना काळेवाडीतील पवनानगर येथे घडली असून शिवानी गोपाल शर्मा (वय २०, रा. पवनानगर, काळेवाडी, मूळ उत्तरप्रदेश) असे आत्महत्या केलेल्या विवाहितेचे नाव आहे.
मिळालेल्या माहितीनुसार, शिवानी व गोपाल यांचा एक वर्षापूर्वीच विवाह झाला होता. ते काळेवाडीतील पवनानगर येथे राहत होते. गोपाल हे एका कंपनीत क्रेन ऑपरेटर असून शिवानी गृहिणी होत्या. गेल्या चार ते पाच दिवसांपासून शिवानी या गोपाल यांच्याकडे नवीन मोबाईल घेण्याचा हट्ट धरला होता. मात्र, गोपाल यांच्याकडे पैसे नसल्याने पगार झाल्यावर नवीन मोबाईल घेऊ, असे त्यांनी आपल्या पत्नीला सांगितले.या कारणावरून शिवानी त्यांच्यावर नाराज झाल्या होत्या.
पत्नीने गळफास घेतल्याचे समोर..
दरम्यान, बुधवारी सकाळी गोपाल हे नेहमीप्रमाणे कामाला गेले. सायंकाळी सातच्या सुमारास घरी आल्यानंतर त्यांना घराचा दरवाजा लोटलेला दिसला. दरवाजा उघडून ते आत गेले असता पत्नीने गळफास घेतल्याचे समोर आले. त्यांनी ताबोडतोब पोलिसांशी संपर्क साधत, या घटनेची माहिती दिली. वाकड पोलिस अधिक तपास करीत आहेत.
