पिंपरी: पिंपरी-चिंचवड (PCMC Election) महापालिकेच्या आगामी निवडणुकीसाठी प्रसिद्ध झालेल्या प्रारूप मतदार यादीत झालेल्या चुका आणि अनियमिततेमुळे सत्ताधारी भाजप आणि राष्ट्रवादी काँग्रेस (अजित पवार गट) हे दोन्ही प्रमुख पक्ष आक्रमक झाले आहेत. भाजपचे विधानपरिषद आमदार अमित गोरखे यांनी या यादीतील त्रुटींवर टीका केली. त्यांच्या माहितीनुसार, पिंपरी विधानसभा मतदारसंघातील सर्व प्रभागांमध्ये 400 हून अधिक मतदारांची नावे दुबार आढळली आहेत. एवढेच नाही तर, इतर मतदारसंघातील मतदारांची नावेही पिंपरीत समाविष्ट झाली आहेत.
महापालिका आयुक्त श्रावण हर्डीकर यांनी निवडणूक विभागाच्या अधिकाऱ्यांची तातडीने बैठक घेऊन याद्यांमध्ये त्वरित सुधारणा करण्याचे आदेश दिले आहेत.
निवडणुकीचे काम फक्त कार्यालयात बसून झाल्यामुळे याद्यांमध्ये हा मोठा घोळ झाला, असा त्यांचा थेट आरोप आहे. याशिवाय, राष्ट्रवादी काँग्रेसचे शहराध्यक्ष योगेश बहल यांनीही यादीतील चुकांची माहिती उपमुख्यमंत्री अजित पवार यांना दिली असून, त्यांनी आयुक्तांना भेटून त्वरित दुरुस्तीची मागणी केली आहे.
आयुक्त श्रावण हर्डीकर यांनी अधिकाऱ्यांना तातडीने कार्यवाही करण्याचे आदेश दिले असून प्राप्त झालेल्या हरकती आणि सूचनांनुसार काटेकोरपणे दुरुस्त्या करण्याचे निर्देश दिले आहेत.
32 प्रभागांमधील दुबार नावे त्वरित काढण्याचे निर्देश देण्यात आले आहेत. हरकतींवर वेळेत कार्यवाही करण्यासाठी अतिरिक्त कर्मचाऱ्यांची नियुक्ती करण्याच्या सूचनाही आयुक्त श्रावण हर्डीकर यांनी अधिकाऱ्यांना दिल्या आहेत.
