Nagpur News : नागपूर शहरातील डिगडोह देवी परिसरात भारतीय जनता पक्षाच्या नगरसेवक पदाच्या उमेदवारासह त्यांच्या काही कार्यकर्त्यांनी कर्तव्य बजावत असलेल्या एका पोलीस कर्मचाऱ्याला सार्वजनिक ठिकाणी बेदम मारहाण केल्याची अत्यंत गंभीर घटना समोर आली आहे. निवडणुकीच्या रणधुमाळीत राजकीय पक्षाच्या प्रतिनिधींकडूनच कायद्याचे उल्लंघन होत असल्याने, शहराच्या कायदा आणि सुव्यवस्थेचा प्रश्न पुन्हा एकदा चर्चेत आला आहे. Nagpur news
काय घडलं?
पोलिसांकडून मिळालेल्या प्राथमिक माहितीनुसार, ही घटना भाजप उमेदवाराच्या प्रचारादरम्यान घडली. उमेदवाराचे कार्यकर्ते डिगडोह देवी परिसरात प्रचारात व्यस्त असताना, रस्त्यावर वाहतूक नियंत्रण करत असलेल्या पोलीस कर्मचाऱ्याशी त्यांचा वाद झाला. हा किरकोळ वाद काही क्षणातच विकोपाला गेला. यावेळी संतप्त झालेल्या उमेदवारासह उपस्थित कार्यकर्त्यांनी मिळून त्या पोलीस कर्मचाऱ्यावर हल्ला चढवला आणि त्याला अमानुष मारहाण करण्यास सुरुवात केली. अचानक झालेल्या या हल्ल्यामुळे परिसरात मोठी खळबळ उडाली आणि नागरिकांची मोठी गर्दी जमली होती. Nagpur news
या गंभीर प्रकाराची माहिती मिळताच पोलीस दलात तातडीने हालचाली सुरू झाल्या. वरिष्ठ अधिकाऱ्यांनी घटनेची गंभीर दखल घेत, सरकारी कामात अडथळा निर्माण करणे, पोलीस कर्मचाऱ्यावर हल्ला करणे, जमाव जमवणे आणि सार्वजनिक शांततेचा भंग करणे अशा विविध गंभीर कलमांखाली भाजप उमेदवारासह मारहाणीत सहभागी असलेल्या सर्व कार्यकर्त्यांविरुद्ध गुन्हा दाखल केला आहे. पोलिसांनी तात्काळ कारवाई करत या प्रकरणातील काही मुख्य आरोपींना ताब्यात घेतले असून, उर्वरित आरोपींचा शोध सुरू आहे. लोकप्रतिनिधी बनू इच्छिणाऱ्या व्यक्तींकडूनच पोलिसांवर हल्ला होणे, हे अत्यंत चिंताजनक असून, नागरिकांकडून या घटनेवर कठोर कारवाई करण्याची मागणी जोर धरू लागली आहे.
