पुणे: नुकत्याच पार पडलेल्या पिंपरी-चिंचवड महापालिका निवडणुकीत (Mahesh Landge) शहरावर वर्चस्व प्रस्थापित करण्यासाठी महेश लांडगे आणि अजित पवार यांच्यात (Ajit Pawar Death) जोरदार राजकीय संघर्ष पाहायला मिळाला. प्रचाराच्या काळात आरोप-प्रत्यारोप, वैयक्तिक टीका आणि एकेरी उल्लेखांमुळे (Pimpri-Chinchwad News) वातावरण तापले होते. या राजकीय लढाईत निकाल महेश लांडगे यांच्या बाजूने लागला. मात्र निकालानंतर अवघ्या पंधरा दिवसांतच अजित पवार यांचे अपघाती निधन झाले आणि पिंपरी-चिंचवडने आपला शिल्पकार गमावल्याची भावना शहरभर पसरली.
स्वर्गीय अजित पवार यांना श्रद्धांजली वाहण्यासाठी पिंपरी-चिंचवड शहराच्या वतीने आयोजित शोकसभेत एक भावनिक क्षण अनुभवायला मिळाला. भोसरी विधानसभा मतदारसंघाचे भाजप आमदार महेश लांडगे अजित पवार यांच्या प्रतिमेसमोर उभे राहिले, हात जोडले आणि अवघ्या 40 सेकंदांच्या भाषणात “दादा, मला माफ करा” असे म्हणत मंच सोडून गेले. नेहमी आक्रमक आणि खंबीर भूमिकेसाठी ओळखले जाणारे लांडगे त्या क्षणी स्पष्टपणे भावुक झाले होते.
महापालिका निवडणुकीदरम्यान अजित पवार आणि महेश लांडगे यांच्यातील संघर्ष टोकाला गेला होता. लांडगे यांनी केलेल्या टीकेला अजित पवार यांनीही जोरदार प्रत्युत्तर दिले होते. “तो मोठा नेता आहे, माझा एकेरी उल्लेख करणारच,” असे म्हणत अजित पवार यांनी पलटवार केला होता. शहराच्या विकासाच्या मुद्द्यावरून दोघांमध्ये आरोप-प्रत्यारोपांच्या फैरी झडल्या. मात्र अजित पवार यांच्या निधनानंतर, शेवटच्या काळात आपण वापरलेल्या शब्दांची बोच लांडगे यांना लागून राहिल्याचे त्यांच्या श्रद्धांजलीतील शब्दांतून दिसून आले.
राजकीय दृष्ट्या पाहता, महेश लांडगे यांची घडण अजित पवार यांच्या मार्गदर्शनाखालीच झाली होती. पिंपरी-चिंचवड उभे राहत असताना अजित पवार यांनी स्थानिक नेत्यांना सोबत घेऊन राजकारणाची दिशा ठरवली. भोसरीतून लांडगे यांना नगरसेवक, स्थायी समिती अध्यक्ष अशी संधी मिळाली. ते तीन वेळा राष्ट्रवादीकडून नगरसेवक झाले. पुढे उमेदवारीवरून मतभेद झाले, 2014 मध्ये त्यांनी अपक्ष निवडणूक लढवली आणि नंतर भाजपमध्ये प्रवेश केला. राजकीय संघर्ष कितीही तीव्र असला, तरी अखेरीस गुरू-शिष्याच्या नात्यातील भावनिक ऋणानुबंध श्रद्धांजलीच्या त्या 40 सेकंदांतून स्पष्टपणे समोर आले.
