पिंपरी-चिंचवड: पिंपरी-चिंचवड महापालिकेचे आयुक्त शेखर सिंह (Commissioner Shekhar Singh Transfer) यांची अचानक बदली करण्यात आली असून, त्यांच्या जागी सध्या पुणे मेट्रोचे महासंचालक असलेले श्रावण हर्डीकर(Shravan Hardikar) यांच्याकडे तात्पुरता अतिरिक्त कार्यभार सोपवण्यात आला आहे. विशेष म्हणजे महापालिका निवडणुकीच्या पार्श्वभूमीवर अंतिम प्रभाग रचना जाहीर झाल्यानंतर अवघ्या 24 तासांत ही बदलीची कारवाई झाल्याने राजकीय वर्तुळात चर्चेला उधाण आले आहे.
राजकीय दबावाचा परिणाम?
प्रभाग रचना ही भाजपसाठी अनुकूल, तर अजित पवार यांच्या नेतृत्वाखालील राष्ट्रवादी काँग्रेससाठी प्रतिकूल असल्याचे स्पष्ट दिसून आले. राष्ट्रवादीकडून प्रभाग रचनेत बदल घडवून आणण्यासाठी मोठ्या प्रमाणावर प्रयत्न झाले. मात्र, आयुक्त शेखर सिंह यांनी कोणताही राजकीय दबाव न जुमानता अंतिम प्रभाग रचना जवळपास तशीच कायम ठेवली. त्यामुळेच त्यांची बदली ही प्रभाग रचनेशी संबंधित असल्याची चर्चा रंगली आहे.
भाजपसाठी लाभदायक ठरलेली रचना कायम
2017 मध्ये भाजपला सत्ता मिळवून देणारी प्रभाग रचना यंदाही बहुतांश तशीच ठेवण्यात आली. राष्ट्रवादीकडून अनेक हरकती, सूचना देण्यात आल्या होत्या. सुनावणीदरम्यानही राष्ट्रवादीच्या पदाधिकाऱ्यांनी आक्रमक भूमिका घेतली होती. मात्र, अंतिम प्रभाग रचनेत केवळ तीन प्रभागांमध्ये किरकोळ बदल करण्यात आले, जे राष्ट्रवादीसाठी फारसे फायदेशीर नसल्याचे बोलले जात आहे. यामुळेच शेखर सिंह यांच्या बदलीच्या निर्णयामागे राजकीय नाराजीचा सूर असल्याची चर्चा आहे.
नाशिक कुंभमेळा आयुक्तपदी बदली
शेखर सिंह यांची बदली नाशिक कुंभमेळा आयुक्तपदी करण्यात आली आहे.
तात्पुरता कार्यभार हर्डीकरांकडे
श्रावण हर्डीकर यांच्याकडे पिंपरी-चिंचवड महापालिकेचा तात्पुरता कार्यभार देण्यात आला असून, ते यापूर्वीही या पदावर कार्यरत होते. त्यांच्यावरही भाजपच्या बाजूने झुकतेपणाचे आरोप झालेले आहेत. आगामी महापालिका निवडणुकीच्या तोंडावर हर्डीकरांना प्रशासकीय समतोल राखण्याचे मोठे आव्हान असणार आहे.
