पिंपरीत थरारक राडा! “तुला आज जिवंत सोडत नाही…” म्हणत तरुणावर पिस्तूलातून थेट गोळीबार; रक्ताच्या थारोळ्यात कोसळला तरुण

पिंपरी-चिंचवड : जाधववाडी परिसरात जुन्या आर्थिक देवाण-घेवाणीच्या वादातून एका तरुणावर पिस्तूलातून गोळीबार करून जीवे मारण्याचा प्रयत्न केल्याची घटना घडली. जाधववाडी येथील ओलियो हॉटेलजवळ सोमवारी (१४ सप्टेंबर) पहाटे हा प्रकार घडला. या प्रकरणी चिखली पोलिसांनी काही तासांत दोघांना ताब्यात घेतले असून, त्यांच्याकडून पिस्तूल, वाहन आणि मोबाईल फोन जप्त करण्यात आला आहे.

पोलिसांनी दिलेल्या माहितीनुसार, रवी धनाजी घोगरे (३५) हे पहाटे सव्वादोनच्या सुमारास ओलियो हॉटेलजवळ आले होते. त्यावेळी स्वप्नील कांताराम जाधव आणि त्याचा चालक रोशन पिंगळे हे तेथे उपस्थित होते. पूर्वीच्या वादातून तसेच आर्थिक देवाण-घेवाणीच्या कारणावरून रवी घोगरे आणि दोघांमध्ये बाचाबाची सुरू झाली. वाद वाढल्यानंतर स्वप्नील जाधव याने घोगरे यांना धमकी देत पिस्तूलातून त्यांच्या दिशेने गोळी झाडल्याचा आरोप आहे.

गोळीबारात रवी घोगरे गंभीर जखमी झाले. घटनेनंतर परिसरात खळबळ उडाली. नागरिक आणि पोलिसांच्या मदतीने त्यांना तातडीने रुग्णालयात दाखल करण्यात आले. त्यांच्यावर उपचार सुरू असून, त्यांची प्रकृती स्थिर असल्याचे सांगण्यात आले आहे.

घटनेची माहिती मिळताच चिखली पोलिसांनी तपासाला वेग दिला. घोगरे यांच्या फिर्यादीवरून स्वप्नील जाधव आणि रोशन पिंगळे यांच्याविरुद्ध भारतीय न्याय संहिता (BNS) तसेच शस्त्र कायद्यानुसार गुन्हा दाखल करण्यात आला आहे. पोलिसांनी दोन्ही आरोपींना ताब्यात घेतले असून, गुन्ह्यात वापरलेले पिस्तूल, वाहन आणि मोबाईल फोन जप्त केला आहे.

 

या गोळीबाराच्या घटनेमुळे जाधववाडी परिसरात काही काळ भीतीचे वातावरण निर्माण झाले होते. या प्रकरणाचा पुढील तपास चिखली पोलीस ठाण्याचे पोलीस निरीक्षक अमोल फडतरे करीत आहेत.