पुणे : गणेशोत्सवाच्या पार्श्वभूमीवर सराईत गुन्हेगारांच्या हालचालींवर लक्ष ठेवत असताना सिंहगड रोड पोलिसांनी हिंगणे खुर्द परिसरातून एका ३१ वर्षीय व्यक्तीला गावठी बनावटीचे पिस्तूल आणि काडतूसासह अटक केली. सिद्धेश सुरेश पवार (वय ३१, रा. विश्रांतिनगर, हिंगणे खुर्द, सिंहगड रोड) असे अटक केलेल्या व्यक्तीचे नाव आहे.
पोलिसांच्या माहितीनुसार, गणेशोत्सवाच्या काळात कायदा व सुव्यवस्था राखण्यासाठी तसेच सराईत गुन्हेगारांच्या हालचालींवर नियंत्रण ठेवण्यासाठी पोलिसांकडून विशेष तपासणी सुरू आहे. ११ सप्टेंबर रोजी तपास पथकाला सिद्धेश पवार हा हिंगणे खुर्द परिसरात फिरत असून त्याच्याकडे पिस्तूल असल्याची माहिती मिळाली.
माहितीची खातरजमा केल्यानंतर पोलिसांनी परिसरात सापळा रचला. पवारला ताब्यात घेतल्यानंतर त्याची झडती घेण्यात आली. त्यावेळी त्याच्याकडे देशी बनावटीचे पिस्तूल आणि एक काडतूस आढळून आले. पोलिसांनी हे शस्त्र आणि काडतूस जप्त केले आहे. याप्रकरणी सिंहगड रोड पोलीस ठाण्यात बेकायदा शस्त्र बाळगल्याप्रकरणी गुन्हा दाखल करण्यात आला आहे.
पवारने हे पिस्तूल नेमके कोणाकडून मिळवले, त्याने ते कशासाठी जवळ बाळगले होते तसेच या शस्त्राचा यापूर्वीच्या कोणत्या गुन्ह्यात वापर झाला आहे का, याचा तपास पोलिसांकडून करण्यात येत आहे.
ही कारवाई पोलीस उपायुक्त डॉ. सागर कवडे आणि सहायक पोलीस आयुक्त विजय कुंभार यांच्या मार्गदर्शनाखाली करण्यात आली. वरिष्ठ पोलीस निरीक्षक विनय पाटणकर, गुन्हे शाखेचे निरीक्षक समीर गायकवाड, उपनिरीक्षक भूपेश साळुंके, उत्तम तारू, अण्णा केकाण, प्रफुल्ल चव्हाण, सतीश मोरे, विकास बांदल आणि राहुल ओलेकर यांच्या पथकाने ही कारवाई केली.
