पिंपरी-चिंचवड: पिंपरी चिंचवडमधील पिंपळे सौदागर परिसरात एका शाळेच्या बाहेर विद्यार्थ्यांमध्ये झालेला किरकोळ वाद थेट हिंसक हल्ल्यापर्यंत गेला आहे. ‘मोटू का म्हणालास’ या एका सामान्य वाटणाऱ्या प्रश्नावरून निर्माण झालेल्या वादाने गंभीर वळण घेतलं आणि मध्यस्थी करण्यासाठी पुढे आलेल्या एका निष्पाप विद्यार्थ्यावर धारधार शस्त्राने जीवघेणा हल्ला करण्यात आला.

ही घटना मंगळवारी दुपारी सुमारास विभग्योर शाळेबाहेर घडली. पोलिसांनी दिलेल्या माहितीनुसार, सोमवारी दोन विद्यार्थ्यांमध्ये ‘मोटू’ असा शब्द वापरल्यामुळे वाद निर्माण झाला होता. या अपमानाचा बदला घेण्यासाठी दुसऱ्या दिवशी विद्यार्थ्यांपैकी एकाने आपल्या भावासोबत आणखी तिघांना बोलावून शाळेबाहेर तयारीने थांबला होता. त्यांनी चिडवणाऱ्या मुलाला अडवत त्याच्यावर दबाव टाकण्याचा प्रयत्न केला.
त्यानंतर हस्तक्षेप करण्यासाठी एका विद्यार्थ्याने मध्यस्थी केली, मात्र हाच विद्यार्थी या साऱ्या गोंधळात बळी ठरला. अचानक त्याच्यावर धारधार शस्त्राने डोक्यावर, मानेवर आणि हातावर हल्ला केला गेला. डोक्याला गंभीर इजा झाल्याने त्याच्या जखमांना टाके पडले असून तो सध्या रुग्णालयात उपचार घेत आहे.

या प्रकारामुळे परिसरात एकच खळबळ उडाली असून विद्यार्थ्यांमध्ये भीतीचे वातावरण निर्माण झाले आहे. सांगवी पोलिसांनी तात्काळ कारवाई करत चार आरोपींना ताब्यात घेतलं असून, प्रकरणाचा सखोल तपास सुरू आहे. शाळेच्या बाहेर विद्यार्थ्यांमध्ये निर्माण झालेला हा वाद इतका टोकाचा जाईल याची कुणालाही कल्पना नव्हती. त्यामुळे मुलांच्या वागणुकीकडे पालक आणि शाळा प्रशासनाने अधिक लक्ष देण्याची गरज अधोरेखित झाली आहे.







