Parth Pawar Land Scam: राष्ट्रवादी काँग्रेस (अजित पवार गट) चे नेते आणि राज्याचे उपमुख्यमंत्री अजित पवार यांचे सुपुत्र पार्थ पवार पुन्हा एकदा वादाच्या भोवऱ्यात सापडले आहेत. त्यांच्या मालकीच्या अमेडिया एलएलपी या कंपनीवर दुसऱ्या जमीन गैरव्यवहाराचा गुन्हा नोंदवला गेला आहे. याआधीच मुंढवा येथील जमीन प्रकरणावरून वाद सुरू असताना, आता या नव्या प्रकरणामुळे पार्थ पवारांची अडचण अधिकच वाढली आहे.
पुणे पोलिसांनी महसूल विभागाच्या तक्रारीनंतर अमेडिया एलएलपी कंपनी आणि संबंधित तहसीलदाराविरुद्ध खडक पोलिस ठाण्यात गुन्हा नोंदवला आहे. तपासात असे स्पष्ट झाले आहे की, महाराष्ट्र शासनाच्या डेअरी विभागाच्या मालकीची जमीन खासगी व्यक्तीच्या नावावर हस्तांतरित करण्याचा प्रयत्न करण्यात आला होता. या प्रक्रियेदरम्यान भूमी अभिलेखामध्ये गंभीर अनियमितता करण्यात आल्याचे निष्पन्न झाले आहे. शासकीय जमिनीचे बेकायदेशीर खरेदी-विक्री करून शासनाची फसवणूक करण्यात आल्याचा आरोप करण्यात आला आहे.
मुंढवा जमीन प्रकरणात याआधी संबंधित तहसीलदार सूर्यकांत येवले यांच्यावर कारवाई करून त्यांना निलंबित करण्यात आले होते. त्यानंतरच्या तपासात ही जमीन पार्थ पवार यांच्या अमेडिया एलएलपी कंपनीमार्फत खरेदी करण्यात आल्याचे उघड झाले होते. या पार्श्वभूमीवर आता कंपनीवर फसवणूक आणि सरकारी संपत्तीच्या गैरव्यवहाराचा आणखी दुसरा गुणा नोंदवण्यात आला आहे.
या आरोपींवर गुन्हा दाखल
1) सुर्यकांत येवले, तहसिलदार, पुणे शहर
२) हेमंत गवंडे रा.इंद्रा मेमरीज
३) राजेंद्र रामचंद्र विध्वंस
४) रुषीकेश माधव विध्वंस
५) सौ. मंगल माधव विध्वंस
६) विदयानंद अविनाश पुराणिक
७) सौ.जयश्री संजय एकबोटे
८) कु.मु.धारक शितल किसनचंद तेजवाणी
९) दिग्विजय अमरसिंह पाटील, संचालक मेसर्स अमेडिया एंटरप्रायझेस् एलएलपी
मुंढवा प्रकरणानंतर आता दुसऱ्या जमीन गैरव्यवहाराचा गुन्हा नोंदवल्याने पार्थ पवारांच्या कंपनीविषयी अनेक नवीन प्रश्न उपस्थित होत आहेत. या दोन्ही प्रकरणांमुळे अजित पवार गटावर राजकीय दबाव वाढण्याची शक्यता व्यक्त केली जात आहे. सध्या पोलिस आणि महसूल विभागाचा तपास सुरू असून, यामध्ये आणखी काही नवे खुलासे होण्याची शक्यता आहे.
राज्याच्या राजकीय वर्तुळात पार्थ पवारांच्या या जमीन प्रकरणांमुळे नवीन वादळ उठले आहे. आता त्यांच्या विरोधात थेट कारवाई होणार का, याकडे सर्वांचे लक्ष लागले आहे.
