शिरूर : महाशिवरात्रीचा उपवास करून भक्तीभावाने यात्रा जत्रांचा उत्सवाने सर्वत्र रंगत चढणार आहे. या दिवशी उपवास करताना खवय्यांची उपवासाची प्लेट विविध प्रकारच्या चविष्ट पदार्थांनी सजणार आहे. यंदा शेंगदाणा महागला असला तरी साबुदाणा आणि भगर स्वस्त झाल्याने महाशिवरात्रीच्या उपवासाला खवय्यांना चविष्ट पदार्थांची मेजवाणी ठरणार आहे.
शिरूर तालुक्यात गावागावात श्री महादेव मंदिरांच्या ठिकाणी यात्रा उत्सवाला रंगत चढलेली असते. काही ठिकाणी अंखड हरिनाम सप्ताहाच्या निमित्ताने भजन, किर्तन, हरिजागर केला जातो. या वेळी सामुहिक साबुदाणा खिचडीचा कार्यक्रमाचे नियोजन असते. त्यामुळे आलेल्या भाविकांना दर्शनाची सुविधा तसेच उपवासाची खिचडी देण्याचे नियोजन संयोजकांकडून करण्यात येते. यंदा महाशिवरात्रीचा उपवास करताना खवय्यांची उपवासाची प्लेट विविध प्रकारच्या पदार्थांनी सजणार आहे.
गेल्या वर्षीच्या तुलनेत यंदा घाऊक बाजारात साबुदाण्याच्या दरात क्विंटलमागे ३ ते ४ हजार रूपयांनी घट झालेली आहे. शेंगदाण्याच्या दरात ३ हजार रूपयांनी वाढ झालेली आहे. महाशिवरात्रीला अनेक जण भक्तिभावाने उपवास करतात. उपवासासाठी विविध खाद्य पदार्थ बनविण्यासाठी आवश्यक असणारा साबुदाणा, भगर, आणी शेंगदाण्याची मागणी वाढली आहे. ग्राहकांची मागणी विचारात घेऊन व्यापारी साबुदाणा, शेंगदाणा, भगर, खरेदी करतात. मागणीत वाढ झाल्याने शेंगदाणे महागले आहेत. मात्र साबुदाणा आणी भगरीचे दर कमी झाले आहेत. मागील वर्षी साबुदाणा ८५ रुपये किलो होता. तो आता ६० रूपयांवर आला आहे. भगर १२५ रूपये प्रती किलोवरून १०० रूपये प्रती किलोवर आली आहे. त्यामुळे उपवासाचे पदार्थ आवडणाऱ्या खवय्यांना महाशिवरात्रीच्या पार्श्वभूमीवर दिलासा मिळाला आहे.
किरकोळ बाजारात किलोचा दर
- शेंगदाणा : १०० ते ११० रूपये प्रतिकिलो
- भगर : १०० ते ११० रूपये प्रतिकिलो
- साबुदाणा : ६० ते ७० रूपये प्रतिकिलो
नाशिक भागातून भगर, तामिळनाडूतुन साबुदाणा, कर्नाटक, आंध्रप्रदेश गुजरातमधून शेंगदाणाची आवक होत असते. या काळात शेंगदाण्याची मागणी वाढत असल्याने त्याचे भाव वाढतात. भगरीला तृणधान्य घोषित केल्याने भगरीच्या मागणित वाढ झाली आहे. बाजारात भगर व साबुदाण्याची आवक चांगली असल्याचे व्यापारी बाळासाहेब फिरोदिया यांनी सांगितले.
