शिरूर : सार्वजनिक बांधकाम पुणे विभागाचे मुख्य अभियंता अतुल चव्हाण यांनी आंदोलनस्थळी येऊन सामाजिक कार्यकर्ते निलेश वाळूंज यांच्या सर्व मागण्या मान्य केल्या आहेत. तसेच त्यासंदर्भात वाळूंज यांना लेखी पत्र देखील दिले आहे. त्यामुळे निलेश वाळूंज यांनी शुक्रवारी (ता.१३) सार्वजनिक बांधकाम विभागाच्या विरोधातील सत्याग्रह आणि अन्नत्याग आंदोलन तात्पुरते स्थगित केले आहे.

सामाजिक कार्यकर्ते निलेश वाळुंज यांनी शिरूर तालुक्यातील आमदाबाद ते मलठण या रस्त्याच्या आणि याच रस्त्यावरील पुलाच्या निकृष्ट कामाच्या सखोल चौकशी बरोबरच तालुक्याच्या इतर भागातील रस्त्यांच्या दूरवस्थेकडे व निकृष्ट कामांकडे शासनाचे लक्ष वेधण्यासाठी शिरूर शहरातील नवीन मध्यवर्ती प्रशासकीय इमारतीमध्ये २ जून पासून सत्याग्रह आंदोलन सुरू केले होते. तसेच प्रशासकीय स्तरावर वाळूंज यांच्या आंदोलनाबाबत सकारात्मक तोडगा निघाला नसल्यामुळे वाळूंज यांनी ९ जून पासून अन्नत्याग आंदोलनही सुरू केले होते. शुक्रवारी सत्याग्रह आंदोलनाचा १२ वा दिवस होता. तसेच अन्नत्याग आंदोलनाचा पाचवा दिवस होता.
याच दरम्यान,शुक्रवारी(ता.१३) सायंकाळी सार्वजनिक बांधकाम पुणे प्रादेशिक विभागाचे मुख्य अभियंता अतुल चव्हाण यांनी आंदोलनस्थळी येऊन सामाजिक कार्यकर्ते निलेश वाळूंज यांच्या सर्व मागण्या मान्य करून त्यासंदर्भात वाळूंज यांना लेखी पत्र दिले आहे. त्यानंतर मोठ्या संख्येने उपस्थित आंदोलक समर्थक, सार्वजनिक बांधकाम विभागाचे कार्यकारी अभियंता मिलिंद बारभाई, सहाय्यक अभियंता अनिल जाधव, उपविभागीय अभियंता सूर्यकांत कुंभार, शिरूरचे तहसीलदार बाळासाहेब म्हस्के, शिरूरचे पोलीस निरीक्षक संदेश केंजळे यांच्या प्रमुख उपस्थितीमध्ये सामाजिक कार्यकर्ते निलेश वाळूंज यांनी सार्वजनिक बांधकाम पुणे प्रादेशिक विभागाचे मुख्य अभियंता अतुल चव्हाण यांच्याकडून लेखी पत्र स्वीकारून आंदोलन थांबवले आहे.

मुख्य अभियंता अतुल चव्हाण यांनी निलेश वाळुंज यांच्या सर्वच मागण्या मान्य केल्या असून, प्रामुख्याने आमदाबाद ते मलठण या रस्त्यावरील कोंढाण पुलाच्या कामाची उच्चस्तरीय चौकशी करण्यात येणार आहे. तसेच रामलिंग ते अण्णापूर या रस्त्याच्या कामाचा दक्षता व गुण नियंत्रण मंडळाचा अहवाल जनतेसमोर सादर करून दोषींवर कठोर कारवाई करण्यात येईल असेही मुख्य अभियंता चव्हाण यांनी यावेळी सांगितले आहे.
याप्रसंगी माजी नरसेवक विठ्ठल पवार, शिवसेनेचे गणेश जामदार, डॉ.संतोष शिंदे,माजी सरपंच प्रकाश थोरात, माऊली पवार, माजी सरपंच दत्तात्रय कुरुंदळे,माजी उपसरपंच लक्ष्मण कुरुंदळे,बजरंग दलाचे विशाल शिंदे,महेश कुरुंदळे, किरण कुरंदळे, मोहन पवार, भाऊ रासकर, दादाभाऊ कुरुंदळे, शरद कुरंदळे, सचिन रासकर, प्रताप दसगुडे, सोमनाथ भगत, मंदा वाळूंज, सुनीता वाखारे, कल्पना पुंडे, सीमा गिरमकर इत्यादी मान्यवर व परिसरातील ग्रामस्थ मोठ्या संख्येने उपस्थित होते.







