लोणी काळभोर (पुणे): पुणे-सोलापूर महामार्गावरील पूर्व हवेलीतील कदमवाकवस्ती, लोणी काळभोर, थेऊर, कुंजीरवाडी, सोरतापवाडी, कोरेगाव मुळ, उरुळी कांचन, परिसरात दुपारी एक वाजल्यापासून एअरटेल या कंपनीचे मोबाईल नेटवर्क नसल्यामुळे ग्राहक चांगलेच मेटाकुटीला आले आहेत.

या नेटवर्क समस्यांमुळे बँकिंग सेवेवर परिणाम होत आहे. प्रत्येक अँड्रॉइड मोबाईल फोनवर फोन पे, गूगल पे, अमेझॉन पे, भारत पे, पेटीयम यासारख्या डिजिटल व्यवहार करण्यासाठी नेटवर्क नसल्याने ग्राहकांचे व्यवहार खोळंबलेले दिसत आहेत. मोबाईल नेटवर्कमुळे कॉल ड्रॉप होणे, आवाज ऐकायला न येणे, फोन ज्याला लावला आहे तो सोडून दुसरीकडेच लागणे या समस्यांचा सामना नागरिकांना करावा लागत आहे. पूर्व हवेलीतील ऐअरटेल या कंपनीची सेवा विस्कळीत झाली आहे.
टॉवरमध्ये तांत्रिक दोष निर्माण झाल्याने परिसरातील ऐअरटेल कंपनीच्या ग्राहकांना व शेतकऱ्यांना अडचणींचा सामना करावा लागत आहे. तांत्रिक बिघाडामुळे ऐअरटेल कंपनीचे नेटवर्क गायब झाले आहे. त्यामुळे ऐअरटेलच्या नेटवर्कवर अवलंबून असलेली सर्व सुविधांचा बट्ट्याबोळ उडाला आहे. डिजिटल युगात, स्मार्टफोन हे आपल्या जीवनाचा अविभाज्य भाग बनले आहे. अनेक कामे स्मार्टफोनच्या मदतीने करता येतात. मात्र फोनमध्ये चांगला सिग्नल असूनही इंटरनेट योग्यरित्या काम करत नाही.

दरम्यान, सध्या पूर्व हवेलीतील सर्वच भागात वेगवेगळ्या ठिकाणी वेगवेगळ्या कंपनीचे टॉवर उभारण्यात आले आहेत. मात्र ग्राहकांची वाढती संख्या लक्षात घेता टॉवरची संख्या कमी पडत असल्याचे दिसून येत आहे. कॉल ड्रॉप आणि रेंज प्रॉब्लेम या समस्यामुळे एअरटेल कंपनीचे ग्राहक मोठ्या प्रमाणात त्रस्त झाले आहेत.







