पुणे : महाराष्ट्र लोकसेवा आयोगामार्फत (एमपीएससी) २ फेब्रुवारी रोजी घेण्यात येणारी महाराष्ट्र गट-ब, अराजपत्रित सेवा संयुक्त पूर्व परीक्षेची प्रवेशपत्रे उमेदवारांना एमपीएससीच्या संकेतस्थळावर उपलब्ध करून देण्यात आली आहेत. परीक्षेला येण्यापूर्वी उमेदवारांनी प्रवेशपत्र डाऊनलोड करून त्यांची प्रिंट सोबत आणावी, अशी सूचना आयोगाच्या वतीने करण्यात आली.

राज्यभरात २ फेब्रुवारी रोजी एमपीएससीची पूर्व परीक्षा होत आहे. परीक्षेच्या दिवशी ऐनवेळी अनेक अडचणींचा सामना उमेदवारांना करावा लागू शकतो. यामध्ये प्रामुख्याने आंदोलने, मोर्चा, वाहतूक कोंडी आणि अतिवृष्टी या समस्यांना उमेदवारांना सामोरे जावे लागण्याची शक्यता नाकारता येत नाही. त्यामुळे खबरदारी म्हणून परीक्षा केंद्रावर दीड तास अगोदर उपस्थित राहावे तसेच प्रत्यक्ष परीक्षा सुरू होण्याच्या वेळेपूर्वी एक तास अगोदर परीक्षा कक्षातील स्वतःच्या बैठक क्रमांकावर उपस्थित राहणे अनिवार्य राहील.
निर्धारित वेळेपेक्षा विलंबाने येणाऱ्या उमेदवारांना प्रवेश दिला जाणार नाही. तसेच याची जबाबदारी आयोगाची राहणार नाही. आयोगाकडून वेळोवेळी दिल्या जाणाऱ्या सूचनांचे पालन करण्याची जबाबदारी उमेदवारांची राहील. सूचनांचे उल्लंघन करणाऱ्या उमेदवारांवर कायमस्वरूपी प्रतिरोधिनाची (डिबार) कारवाई करण्याचा इशारांही आयोगाकडून देण्यात आला आहे.








