पुणे: पुण्यातील धनकवडी येथे सासरच्या छळामुळे विवाहितेने गळफास घेऊन आत्महत्या केल्याची घटना घडली आहे. विवाहितेला आत्महत्येस प्रवृत्त केल्या प्रकरणी नणंदेसह चौघांविरुद्ध सहकारनगर पोलिस ठाण्यात गुन्हा दाखल करण्यात आला आहे. वर्षा तुकाराम रणदिवे असे आत्महत्या केलेल्या महिलेचे नाव आहे. याप्रकरणी उज्ज्वला बागाव, योगेश बागाव, वैशाली बागाव, सुवर्णा बागाव यांच्याविरुद्ध गुन्हा दाखल करण्यात आला आहे. याबाबत तुकाराम रणदिवे यांनी सहकारनगर पोलिस ठाण्यात तक्रार दिली आहे.
पोलिसांनी दिलेल्या माहितीनुसार, आरोपी उज्ज्वला बागाव फिर्यादी तुकाराम रणदिवे यांची बहीण आहे. रणदिवे आणि बागाव शेजारी राहातात. उज्ज्वला, तिचा मुलगा योगेश, मुलगी वैशाली, सुवर्णा यांनी वर्षा रणदिवे यांना टोमणे मारून छळ केला. हा छळ असह्य झाल्याने २४ मे रोजी वर्षा यांनी गळफास घेऊन आत्महत्या केली. याप्रकरणी सहकारनगर पोलिसांनी अकस्मात मृत्यूची नोंद केली आहे.
वर्षा यांचे पती तुकाराम रणदिवे यांनी पोलिसांकडे फिर्याद दिली. पोलिसांनी केलेल्या अधिक तपासात वर्षा यांनी आरोपींनी केलेल्या छळामुळे आत्महत्या केल्याचे समोर आले. याप्रकरणी पोलिसांत गुन्हा दाखल केला असून सहायक पोलीस निरीक्षक पवार तपास करत आहेत.
