Lonikalbhor : हवेली तालुक्यातील लोणी काळभोर आणि कदमवाकवस्ती या दोन मोठ्या ग्रामपंचायतींच्या हद्दीत कचरा टाकण्याच्या जागेवरून निर्माण झालेल्या वादावर तोडगा काढण्यासाठी 9 मार्च रोजी दुपारी 4 वाजता उच्चस्तरीय बैठक आयोजित करण्यात आली आहे. ही बैठक हवेलीचे उपविभागीय अधिकारी डॉ. यशवंत माने यांच्या दालनात होणार असून, संबंधित सर्व विभागांचे अधिकारी आणि स्थानिक प्रतिनिधी उपस्थित राहणार आहेत.
या बैठकीची मागणी एमआयटी एडीटी विद्यापीठाचे कुलसचिव डॉ. महेश चोपडे यांनी केली होती. गेल्या काही दिवसांत लोणी काळभोर परिसरात कचरा व्यवस्थापनाचा प्रश्न गंभीर बनला आहे. विशेषतः मुळा-मुठा नदीच्या पात्रात टाकण्यात येणारा कचरा हा पर्यावरणीय आणि आरोग्याच्या दृष्टीने मोठा मुद्दा ठरला आहे.
27 फेब्रुवारी रोजी सकाळी सुमारे 9.30 वाजता नदीपात्रात साठलेल्या कचऱ्याला अचानक आग लागली. सुरुवातीला छोटी वाटणारी ही आग तब्बल 4 दिवस सतत धुमसत राहिली. या आगीतून उठणाऱ्या काळ्या धुरामुळे परिसरातील हवा प्रदूषित झाली. विशेषतः जवळच असलेल्या एमआयटी शैक्षणिक संकुलातील विद्यार्थी आणि स्थानिक नागरिकांना त्याचा मोठा त्रास सहन करावा लागला. विद्यार्थ्यांनी आंदोलन केल्यानंतर विद्यापीठ परिसरातून कचरा वाहून नेणाऱ्या गाड्यांना नदीकडे जाण्यास बंदी घालण्यात आली.
मात्र या निर्णयाचा दुसरा परिणामही दिसून आला. कचऱ्याच्या गाड्यांचा मार्ग बंद झाल्याने लोणी काळभोर आणि कदमवाकवस्ती या दोन्ही गावांमध्ये कचऱ्याचे ढीग रस्त्यांवर आणि मोकळ्या जागांवर साचू लागले. दुर्गंधी, डास-माशांचा वाढता प्रादुर्भाव आणि संभाव्य रोगराई यामुळे नागरिकांमध्ये चिंता वाढली आहे.
या पार्श्वभूमीवर होणाऱ्या बैठकीत कचरा व्यवस्थापनासाठी कायमस्वरूपी जागा निश्चित करणे, वैज्ञानिक पद्धतीने प्रक्रिया प्रकल्प उभारणे आणि वाहतूक मार्ग निश्चित करणे यासंदर्भात महत्त्वाचे निर्णय अपेक्षित आहेत. बैठकीला पुणे महानगर प्रदेश विकास प्राधिकरणाच्या घनकचरा व्यवस्थापन विभागाचे अधिकारी, पुणे जिल्हा परिषद, महाराष्ट्र प्रदूषण नियंत्रण मंडळ, हवेली पंचायत समिती, जलसंपदा विभाग तसेच दोन्ही ग्रामपंचायतींचे सरपंच व अधिकारी उपस्थित राहणार आहेत.
स्थानिक नागरिक आणि विद्यार्थ्यांच्या दृष्टीने ही बैठक महत्त्वाची मानली जात आहे, कारण या निर्णयावर परिसरातील पर्यावरण, सार्वजनिक आरोग्य आणि कचरा व्यवस्थापनाची भविष्यातील दिशा ठरणार आहे.
