आदित्य बोराटे
Indapur : इंदापूर पोलिसांनी शहरात वाहतुकीच्या नियमांचे उल्लंघन करून बेशिस्तपणे वाहन चालवणाऱ्यांवर धडक कारवाई केली आहे. या मोहिमेत एकूण 28 वाहन चालकांवर कारवाई करण्यात आली असून, त्यांच्याकडून 38 हजार 500 रुपयांचा दंड वसूल करण्यात आला आहे. इंदापूर पोलीस प्रशासनाने ही मोहीम राबविल्याने बेशिस्त वाहन चालकांचे धाबे दणाणले आहेत.
गुरुवारी (दि. 5 मार्च) सायंकाळी 6: 30 ते 8: 30 या वेळेत इंदापूर शहरातून जाणाऱ्या जुन्या पुणे-सोलापूर महामार्गावर ही कारवाई करण्यात आली. यामध्ये विना नंबर प्लेट दुचाकी चालवणे, ट्रिपल सीट प्रवास करणे, कर्कश आवाजाचे सायलेन्सर वापरून ध्वनी प्रदूषण करणे, हेल्मेटचा वापर न करणे आणि विना परवाना वाहन चालवणे अशा विविध कारणांमुळे पोलिसांनी दंडात्मक कारवाईचा बडगा उगारला.
गेल्या काही दिवसांपासून इंदापुरात काही दुचाकीस्वार वाहतुकीच्या नियमांचे उल्लंघन करून बेफिकीरपणे वाहने चालवत होते. याचा मोठा त्रास इतर वाहन चालकांसह शाळकरी विद्यार्थी आणि ज्येष्ठ नागरिकांना सहन करावा लागत होता. ही बाब लक्षात घेऊन इंदापूर पोलीस ठाण्याचे पोलीस निरीक्षक विलास नाळे यांच्या मार्गदर्शनाखाली वाहतूक शाखेचे पोलीस उपनिरीक्षक हनुमंत वाघमारे, पोलीस कॉन्स्टेबल अनिल नागरगोजे, सुहास आरणे, अमोल खाडे, पद्मसिंह शिंदे आणि महिला पोलीस कॉन्स्टेबल शोभा खरात यांनी ही कारवाई केली. या कारवाईचे सर्वसामान्य नागरिकांमधून कौतुक होत आहे.
