lonikalbhor : पुणे–सोलापूर राष्ट्रीय महामार्गावर ऑइल सांडल्याने धोकादायक परिस्थिती निर्माण झाली आणि एकामागोमाग अनेक दुचाकी घसरून अपघातग्रस्त झाल्याची घटना घडली. या अचानक घडलेल्या प्रकारामुळे काही काळ नागरिकांमध्ये भीतीचे वातावरण निर्माण झाले होते. ही घटना लोणी स्टेशन (ता. हवेली) परिसतील हाडके पेट्रोल पंपासमोर बुधवारी (ता. 18) रात्री सुमारे नऊ वाजण्याच्या सुमारास घडली.
अज्ञात वाहनातून मोठ्या प्रमाणात तेल रस्त्यावर सांडल्याने महामार्गाचा एक भाग अक्षरशः घसरडा झाला होता. याची कल्पना नसलेल्या दुचाकीस्वारांचे वाहन अचानक घसरून अनेक जण रस्त्यावर पडले. अपघातांमध्ये काही दुचाकीस्वार किरकोळ जखमी झाले असून सुदैवाने कोणतीही जीवितहानी झाली नाही. मात्र अनेक दुचाकींचे मोठ्या प्रमाणात नुकसान झाले आहे. काही वाहनांचे हेडलाईट, इंडिकेटर आणि बॉडीचे भाग तुटल्याचे दिसून आले.
नागरिकांचा जीव मुठीत धरून प्रवास
घटनेनंतर काही काळ त्या मार्गावरून जाणाऱ्या वाहनचालकांना अत्यंत सावधगिरीने प्रवास करावा लागला. रस्त्यावर तेलाचा थर पसरल्याने अनेक वाहनचालकांनी गाड्या थांबवून परिस्थितीचा अंदाज घेतला. काहींनी तर दुचाकी हाताने ढकलत सुरक्षित अंतर पार केले.
वाहतूक कोंडी, प्रशासनाला उशिरा माहिती
अपघातांच्या मालिकेमुळे काही काळ या मार्गावर वाहतूक कोंडीही झाली होती. स्थानिक नागरिकांनी आणि वाहनचालकांनी प्रशासनाला व पोलिसांना माहिती दिल्यानंतर परिस्थिती नियंत्रणात आणण्यासाठी हालचाली सुरू झाल्या. रस्त्यावर वाळू टाकून घसरडेपणा कमी करण्याचे काम करण्यात आले.
जबाबदार कोण? नागरिकांचा संताप
महामार्गासारख्या अत्यंत वर्दळीच्या रस्त्यावर तेल सांडूनही त्याची तात्काळ दखल न घेतल्याने नागरिकांनी तीव्र नाराजी व्यक्त केली आहे. अशा प्रकारच्या घटनांमुळे मोठा अपघात होऊ शकला असता, अशी प्रतिक्रिया स्थानिकांकडून व्यक्त होत आहे. संबंधित वाहनचालक किंवा कंपनीचा शोध घेऊन कारवाई करावी, अशी मागणीही करण्यात येत आहे.
दरम्यान, या घटनेमुळे राष्ट्रीय महामार्गावरील सुरक्षेचा प्रश्न पुन्हा एकदा ऐरणीवर आला असून, अशा प्रकारच्या धोकादायक परिस्थितीवर तात्काळ उपाययोजना करण्यासाठी कायमस्वरूपी यंत्रणा उभी करण्याची गरज असल्याचे मत नागरिकांनी व्यक्त केले आहे.
