लोणी काळभोर : पाण्याची पाईपलाईन शेतीतील सामाईक बांधावरून नेण्याच्या कारणाने झालेल्या वादातून बाप-लेकांनी एकाला बेदम मारहाण केल्याची धक्कादायक घटना घडली आहे. ही घटना लोणी काळभोर (ता. हवेली) ग्रामपंचायत हद्दीतील रूपनर वस्ती परिसरात बुधवारी (ता. १३) सकाळी आठ वाजण्याच्या सुमारास घडली. या प्रकरणी लोणी काळभोर पोलीस ठाण्यात बाप-लेकांच्या विरोधात गुन्हा दाखल करण्यात आला आहे.
सोमनाथ मारुती पिंगळे (लोणी काळभोर, ता. हवेली) असे मारहाण झालेल्या शेतकऱ्याचे नाव आहे. तर बाळासाहेब साहेबराव वीरकर व त्यांचा मुलगा गणेश बाळासाहेब वीरकर (दोघेही रा. वीरकर मळा, लोणी काळभोर, ता. हवेली) अशी गुन्हा दाखल झालेल्या बाप-लेकांची नावे आहेत.
पोलिसांनी दिलेल्या माहितीनुसार, सोमनाथ पिंगळे व बाळासाहेब वीरकर यांची लोणी काळभोर परिसरात शेती आहे. या दोघांच्या शेताचा एकच बांध आहे. वीरकर यांनी पिंगळे यांना कोणतीही कल्पना न देता सामाईक बांधावरून पाईपलाईन घेत होते. या वेळी पिंगळे यांनी पाईपलाईन बांधावरून नेण्यास विरोध केला.
दरम्यान, बांधावरून पाईपलाईन नेण्यास विरोध केल्याचा राग मनी ठेवून बाळासाहेब वीरकर व गणेश वीरकर या बाप-लेकांनी पिंगळे यांना काठीने मारहाण केली. या मारहाणीत पिंगळे हे गंभीर जखमी झाले असून, त्यांच्यावर एका खासगी दवाखान्यात उपचार सुरु आहेत.
या प्रकरणी सोमनाथ पिंगळे यांनी लोणी काळभोर पोलीस ठाण्यात बाप-लेकांच्या विरोधात फिर्याद दिली आहे. त्यानुसार बाळासाहेब वीरकर व गणेश वीरकर या बाप-लेकांच्या विरोधात गुन्हा दाखल करण्यात आला आहे. पुढील तपास लोणी काळभोर पोलीस करीत आहेत.
