पोपट पाचंगे
पुणे: शिरूर तालुक्यात मागील काही दिवसांपासून सुरू असलेल्या अवकाळी पावसाने शेतकऱ्यांची चिंता वाढवली होती. मात्र गेल्या तीन दिवसांपासून हवामानाने उघडीप दिल्यामुळे शेतीकामाला चालना मिळाली आहे. कडक उन्हामुळे जमिनीत वाफसा झाल्याने शेतकऱ्यांनी खरीप हंगामाच्या तयारीसाठी कंबर कसली असून, शेतात विविध मशागतीची कामे वेगाने सुरू झाली आहेत.
तालुक्यातील अनेक शेतकरी शेणखत पांगवणे, नांगरणी, फळी मारणे यासारख्या प्राथमिक कामांमध्ये व्यस्त आहेत. काही शेतकऱ्यांनी बी-बियाण्यांची खरेदी सुरू केली आहे, तर काहींनी पेरणीलाही सुरुवात केली आहे. यंदा मे महिन्याच्या अखेरीस वळवाच्या पावसाचे आगमन अपेक्षित होते. मात्र अचानक आणि सलगपणे पडलेल्या मुसळधार अवकाळी पावसामुळे हवामान अंदाज फसले आणि मशागतीचे वेळापत्रकही कोलमडले.
प्रगतिशील शेतकरी दौलत नरवडे यांनी सांगितले की, “मे महिन्यात बहुतांश शेतकरी पूर्व मशागतीची कामे करतात. मात्र यंदाच्या अवकाळी पावसामुळे शेतात काम करणे शक्य झाले नाही. जमिनीत मोठ्या प्रमाणात ओलावा निर्माण झाला आणि तणही वाढले. आता हवामान उघडल्याने नांगरणी, पाळी मारणे यासारखी कामे गतीने सुरू आहेत. काही शेतकरी नांगरणी न करताच थेट बाजरी व मुगाची पेरणी करत आहेत.” या हवामानातील बदलांमुळे खरीप हंगामाच्या तयारीला उशीर झाला असला, तरी उघडीप मिळाल्याने शेतकऱ्यांमध्ये दिलासा आणि उत्साह दोन्ही दिसून येत आहेत.
