पुणे : पुणे मेट्रोच्या पहिल्या टप्प्यातील महत्त्वपूर्ण स्थानक असलेले खडकी मेट्रो स्थानक उद्या, शनिवार दिनांक २१ जून २०२५ रोजी अधिकृतपणे प्रवासी सेवेसाठी सुरू होणार आहे. पिंपरी चिंचवड मनपा ते स्वारगेट या मार्गिकेवरील हे स्थानक प्रवाशांसाठी मोठी सुविधा ठरणार आहे.
हे स्थानक खडकी रेल्वे स्थानकाच्या अगदी जवळ असल्याने मेट्रो व रेल्वे या दोन्ही सार्वजनिक वाहतूक सेवा एकत्रितपणे उपलब्ध होणार आहेत. खडकी मेट्रो स्थानकातून थेट खडकी रेल्वे स्थानकात प्रवेश करण्याची व्यवस्था करण्यात आली आहे. त्यामुळे या भागातील रहिवासी आणि रेल्वेने प्रवास करणाऱ्या नागरिकांना मेट्रो सेवा अधिक सुलभ आणि सोयीस्कर होणार आहे.
या नव्या मेट्रो स्थानकाच्या सुरूवातीमुळे खडकी, पुणे विद्यापीठ, औंध आयटी पार्क, खडकी कॅन्टोन्मेंट, खडकी बाजार, रेंज हिल, औंध रस्ता, ऑर्डिनन्स फॅक्टरी हॉस्पिटल, मुळा रस्ता या भागांमध्ये प्रवास करणाऱ्या नागरिकांना मोठा दिलासा मिळणार आहे. मेट्रोच्या माध्यमातून सार्वजनिक वाहतुकीचा अखंड, वेगवान व पर्यावरणपूरक पर्याय आता या परिसरात उपलब्ध होणार आहे.
या संदर्भात महामेट्रोचे व्यवस्थापकीय संचालक श्रावण हर्डीकर यांनी सांगितले की, “पुणे मेट्रोच्या विस्तारात खडकी स्थानकाची भर पडल्यामुळे पुणे व पिंपरी चिंचवड या जुळ्या शहरांना जोडणाऱ्या रस्त्यावरील सार्वजनिक वाहतूक व्यवस्था अधिक बळकट झाली आहे. खडकी परिसरात राहणारे व कामानिमित्त प्रवास करणारे नागरिक याचा लाभ घेतील.”
पुणेकरांसाठी ही मेट्रो सेवा म्हणजे प्रवासातली नवी गती, नवा विश्वास आणि आधुनिकतेची दिशा ठरणार आहे.
