लोणी काळभोर, ता. २१ : शेतजमिनीच्या वादातून शेतातील ऊस, सिताफळ बाग आणि इतर फळझाडांची दोन जेसीबीच्या सहाय्याने मोठ्या प्रमाणात तोडफोड केल्याची घटना उघडकीस आली आहे. या घटनेत लाखो रुपयांचे नुकसान झाले असून महिलांना शिवीगाळ, धमक्या आणि मारहाण केल्याचा धक्कादायक प्रकार समोर आला आहे. ही घटना कोलवडी-साष्टे (ता. हवेली) ग्रामपंचायत हद्दीत गुरुवारी (ता. २१) सकाळी सुमारे ९ वाजण्याच्या सुमारास घडली.
या प्रकरणी दिपाली किरण साळुंके (रा. साळुंके वस्ती, कोलवडी, ता. हवेली) यांनी लोणीकंद पोलीस ठाण्यात फिर्याद दिली आहे. रोहित मोडक (रा. हडपसर) व त्याच्यासोबत असलेल्या सात ते आठ जणांविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी दिपाली साळुंके व त्यांच्या जाऊबाई शेतात खुरपणीचे काम करत असताना अचानक दोन जेसीबी आणि सात ते आठ जणांचा समूह शेतात दाखल झाला. या गटासोबत रोहित मोडक हाही उपस्थित होता.
आरोपींनी कोणतीही पूर्वसूचना अथवा परवानगी न घेता गट क्रमांक ५४ मधील सुमारे ६० गुंठे ऊस शेती जेसीबीच्या सहाय्याने जमीनदोस्त करण्यास सुरुवात केली. महिलांनी विरोध केला असता त्यांच्याकडे दुर्लक्ष करून संपूर्ण ऊस पीक उद्ध्वस्त करण्यात आले. त्यानंतर आरोपींनी शेजारील सुमारे २०० सिताफळ झाडांची बागही जेसीबीच्या सहाय्याने उपटून टाकली.
याचवेळी शेतातील ठिबक सिंचन व्यवस्था, पाणीपुरवठ्याची पाईपलाईन, वीज कनेक्शन तसेच शेतातील नावाच्या पाट्यांची तोडफोड करण्यात आली. एवढेच नव्हे, तर ३० आंब्याची झाडे, १० नारळाची झाडे आणि ४ सागाची झाडेही नुकसानग्रस्त झाली आहेत.
या घटनेचा व्हिडीओ मोबाईलवर चित्रीत करण्याचा प्रयत्न करणाऱ्या प्रज्ञा साळुंके यांच्या हातातील मोबाईल आरोपींनी हिसकावून घेण्याचा प्रयत्न केला. तसेच फिर्यादींचा मुलगा अथर्व साळुंके व भाचा साहिल जगताप यांचा पाठलाग करून त्यांना जीवे मारण्याच्या धमक्या देण्यात आल्या. काही महिलांनी दगड हातात घेऊन अंगावर धाव घेतल्याचाही आरोप करण्यात आला आहे.
दरम्यान, ११२ क्रमांकावर फोन करून पोलिसांना माहिती देण्यात आली. पोलिसांचे पथक घटनास्थळी पोहोचण्यापूर्वीच संबंधित आरोपी पसार झाले.याप्रकरणी दिपाली साळुंके यांनी लोणीकंद पोलीस ठाण्यात फिर्याद दिली असून, त्यानुसार रोहित शिवाजी मोडक व त्याच्यासोबत असलेल्या अन्य अनोळखी व्यक्तींविरोधात भारतीय न्याय संहिता (BNS) 2023 अंतर्गत कलम 329(3), 189(2), 189(6), 324, 351(2) आणि 352 नुसार गुन्हा दाखल करण्यात आला आहे. पुढील तपास पोलिसांकडून सुरू आहे.
