पुणे : प्राध्यापक नामदेव जाधव (Namdev Jadhav) यांना पुण्यात काळं फासल्याचा प्रकार समोर आला आहे. राष्ट्रवादी काँग्रेसचे अध्यक्ष शरद पवार यांच्या गटाच्या कार्यकर्त्यांनी नामदेव जाधव यांना काळ फासलं आहे. राष्ट्रवादी शरद पवार गटाचे शहराध्यक्ष प्रशांत जगताप यांनी जाधव यांच्यावरील हल्ल्याची जबाबदारी स्वीकारली आहे. “आम्ही आजच्या या आंदोलनाची जबादारी स्वीकारतो. होय, आम्ही नामदेवराव जाधव यांना काळं फासलं. या नामदेव जाधवांना विक्रोळी पोलिसांनी खंडणीच्या गुन्ह्याखाली अटक केली होती. एका शाळेत पैसे देऊन मुलांचे मार्क्स वाढल्याप्रकरणी त्याची हकालपट्टी करण्यात आली होती. आणि आज ते शरद पवार यांच्यावर टीका करतायत”, असं प्रशांत जगताप म्हणाले.
“लोकशाहीमध्ये टीका करण्याचा अधिकार आहे. पण तो खऱ्या पुराव्यांवर आधारित असावा. खासदार शरद पवार हे महाराष्ट्राच्या राजकारणात 60 वर्षांपासून अधिक काळ आहेत. त्यांच्यावर नाहक खोटे आरोप केले जातात. हे आरोप होत असताना त्यांच्याकडून पुरावे सादर केले जात नव्हते. पुरावे असतील, तर निश्चित टीका करावी. आम्ही जाधव यांना आठ दिवसांचा कालावधी दिला होता. आम्ही त्यांना इशारा देऊनही ती भाषा थांबवली नाही. त्यामुळे आम्ही त्यांच्या तोंडाला काळं फासलं”, अशी प्रतिक्रिया प्रशांत जगताप यांनी दिली.
नामदेव जाधव यांची हल्ल्यानंतर प्रतिक्रिया
नामदेव जाधव यांनी संबंधित घटनेनंतर पहिली प्रतिक्रिया दिली आहे. “मराठा आरक्षणाचे मारेकरी शरद पवारच असल्याचे कागदपत्रे माझ्या हाती लागले होते. त्यामुळे राष्ट्रवादीच्या कार्यकर्त्यांना राग आला. आमचा आज कार्यक्रम होता. तो कार्यक्रम या लोकांनी उधळून लावला. त्यानंतर मी पत्रकारांशी बोलत असताना त्यांनी माझ्याविरोधात हल्ला केला आहे”, अशी प्रतिक्रिया नामदेव जाधव यांनी दिली. ते पुढे म्हणले, “मी असं समजतो की, शाहू, फुले, आंबेडकरांच्या विचारांचं नाव घेणाऱ्या गुंडांनी शाहू, फुले, आंबेडकरांच्या विचारांचा आज खून केला आहे. छत्रपती शिवाजी महाराजांचे विचार जगभरात जाऊ नयेत, यासाठी त्यांनी माझ्यावर हल्ला केला. पोलिसांनी मला वाचवण्याचा प्रयत्न केला. एकप्रकारे हा लोकशाहीवर हल्ला आहे”, असं देखील नामदेव जाधव म्हणाले.
“याप्रकरणी संबंधित लोकांवर गुन्हा दाखल करावा, अशी मी मागणी करतो. मी माझ्या वैयक्तिक गोष्टीसाठी भांडत नव्हतो, तर मराठा समाजासाठी भांडत होतो. 5 कोटी मराठ्यांवरली हा हल्ला आहे, असं समजायला हरकत नाही. मी या प्रकरणात कार्यकर्त्यांना जबाबदार धरणार नाही. या प्रकरणात पहिलं नाव शरद पवार आणि दुसरं नाव रोहित पवार यांचं असणार आहे. त्यांची आमदारकी, खासदारकी रद्द करण्यासाठी मी प्रचंड मोठं पाऊल उचलणार आहे”, असं नामदेव जाधव म्हणाले.
