लोणी काळभोर : पुणे शहर पोलीस ठाण्याच्या हद्दीतील सर्वच प्रकारचे अवैध धंदे बंद करण्याचे आदेश पोलीस आयुक्त अमितेश कुमार यांनी दिले आहेत. मात्र, लोणी काळभोर पोलीस ठाण्याच्या हद्दीतील एक दादा बिनधास्तपणे हातभट्टी अड्डा चालवीत आहे. तर, हडपसर येथील 15 नंबर परिसरात एक वजनदार ‘अण्णा’ हॉटेलमध्ये खाली पत्त्यांचा खेळ आणि वरती खुलेआम देहविक्री करीत आहेत. तसेच फुरसुंगी पोलीस ठाण्याच्या हद्दीतील लॉजवर देखील ‘जिस्म का व्यापार’ सुरु असल्याची जोरदार चर्चा नागरिकांमध्ये आहे.
लोणी काळभोर (ता. हवेली) ग्रामपंचायत हद्दीतील गट क्र. ११६० शेजारी असलेल्या वनविभागाच्या जागेत एक दादा मागील तीन महिन्यांपासून खुलेआम हातभट्टी अड्डा चालवीत आहे. या अवैध धंदेचालकाच्या ”हाके”ला हडपसर मधील एक ”घनशाम” येत आहे. तर हा धंदेचालक एका सत्ताधारी आमदाराचा निकटवर्तीय असून त्यांच्याशी त्याचे जवळचे हितसंबंध असल्याचे समोर येत आहे. याच पोलीस ठाण्यातील एक ”वीर” बहाद्दर व ”खिलाडी” कुमार हे दोघेजण संगनमताने मोठी माया गोळा करीत आहेत. याबाबतची माहिती पोलीस ठाण्याच्या कारभाऱ्याला दिली जात नसल्याने सदर अड्ड्यावर पोलीस प्रशासनाकडून कारवाईचा बडगा उगारला जात नाही.
लोणी काळभोर वनविभागाचा खाजगी कर्मचारी दादाच्या हातभट्टीच्या अड्ड्यापासून अवघ्या 100 मीटर अंतरावर राहत आहे. त्यामुळे या ‘बाबू’लाही फुलाची पाकळी दिली जात आहे. त्याचबरोबर वनविभागाच्या अधिकाऱ्यांचीही मोठी मनधरणी केली जात आहे. तर राज्य उत्पादन शुल्क विभाग कारवाई करेन, या भीतीने दादाकडून रेल्वे पुलावर दोन खबरी लक्ष देण्यासाठी दररोज रात्री बसवले जातात. हे खबरी पुलाच्या खालून जाणाऱ्या गाडीवर लक्ष देतात. धोक्याची घंटा वाजली की, सर्वजण गबाळ गुंडाळून तेथून रफुचक्कर होतात. या अवैध धंद्यामागे वनखाते-50 हजार, बाबू- 5 हजार , शेतकरी (पाणी)- 15 हजार, स्वयंघोषित पत्रकार 10 हजार, तर सर्वात मोठी मोह माया म्हणजेच एक लाख पोलीस प्रशासनाला दिली जात आहे.
पुणे-सोलापूर राष्ट्रीय महामार्गालगत 15 नंबर परिसरात एका वजनदार आण्णाचे हॉटेल आहे. या हॉटेलवर मागील तीन वर्षापूर्वी सामाजिक सुरक्षा विभागाने छापा टाकला होता. या छाप्यात पोलिसांनी मुलींची सुटका करून एका वेटरवर पिटांतर्गत कारवाई केली होती. मात्र या हॉटेलवर मागील सहा महिन्यांपासून हॉटेलमध्ये खाली पत्त्यांचा खेळ आणि वरती खुलेआम देहविक्री सुरु आहे. तर या हॉटेलमध्ये पत्ते खेळण्यासाठी काही पोलीस सुद्धा येत आहेत. तर या हॉटेलमध्ये वरच्या दोन मजल्यांवर खुलेआम देहविक्री केली जात आहे. या हॉटेलच्या स्वागतकक्षाच्या पाठीमागे एक गुप्त खोली आहे.
वजनदार अण्णाने मुलींच्या सुरक्षेच्या दृष्टीकोनातून लॉजच्या जवळ असलेल्या इमारतीच्या तिसऱ्या मजल्यावर भाडेतत्वावर खोली घेतली आहे. ही इमारत लॉजच्या अगदी शेजारी असल्याने मुली रुमच्या गॅलरीमधून थेट लॉजच्या टेरेसवर येतात. त्यानंतर त्या लॉजमध्ये प्रवेश करतात. तसेच हा अण्णा लॉजचे मुख्य प्रवेशद्वार नेहमी बंद करून ठेवतो. ओळखीचा ग्राहक असेल, तरच त्यांना आतमध्ये प्रवेश देतो. अशा पद्धतीने या लॉजवर खाली जुगार व वर वेश्या व्यवसाय सुरु आहे. अण्णाचे पोलीस प्रशासनातील अधिकारी व कर्मचाऱ्यांशी जवळचे हितसंबंध आहेत. त्यामुळे या अण्णालाही पोलीस प्रशासनाच्या कारवाईपासून मोकळीक मिळाली आहे.
लोणी काळभोर व हडपसर पोलीस ठाण्याच्या हद्दीतून काही गावांचा समाविष्ठ करून नव्याने सुरु करण्यात आलेल्या फुरसुंगी (ता. हवेली) पोलीस ठाण्याच्या हद्दीत मागील चार महिन्यांपासून सर्वच प्रकारच्या अवैध धंद्यांचा सूळसुळाट सुरु आहे. हडपसर-सासवड मार्गावर मटका, जुगार, गांजा विक्री, गावठी दारु व देह विक्री व्यवसायासह सर्व प्रकारच्या अवैध धंद्यांचे स्तोम माजले आहे. पोलीस प्रशासन या अवैध धंद्यांवर कारवाईचा बडगा उगारीत नसल्याने अवैध धंदे सुसाट सुरु आहेत. संबंधित अवैध धंदे चालकांच्या पाठीमागे काही राजकीय नेते व पोलीस खात्यातील काही वरिष्ठांचे आशीर्वाद आहेत. त्यामुळे हे धंदे राजरोसपणे सुरु असून गुन्हेगारांचे अड्डे बनले आहेत.
दरम्यान, पुणे शहर पोलीस दलाची तगडी यंत्रणा असतानाही अवैध धंदे बिनधास्त सुरु आहेत. या अवैध धंद्यावर पोलीस कारवाई करण्यास टाळाटाळ करीत असल्याची चर्चा दबक्या आवाजात नागरिकांमध्ये सुरु आहे. तसेच हे सगळे अवैध धंदे खुलेआम सुरु आहेत, मग हे गोरख धंदे कोणाच्या आशीर्वादाने सुरु आहेत? तर लोणी काळभोर, हडपसर व फुरसुंगी पोलीस नेमके करतात तरी काय? असा संतप्त सवाल नागरिकांनी केला आहे. स्वच्छ प्रतिमा म्हणून ओळख असलेले पुणे शहर पोलीस आयुक्त अमितेश कुमार हे यावर ठोस उपाययोजना म्हणून काय कारवाई करणार?. याकडे संपूर्ण जिल्ह्याचे लक्ष लागले आहे.
लोणी स्टेशन परिसरात दररोज लाखों रुपयांची गांजाची विक्री
पुणे सोलापूर राष्ट्रीय महामार्गावरील लोणी स्टेशन परिसरातील एका गॅस एजन्सीच्या जवळ एक टपरी आहे. या टपरीतून दररोज लाखों रुपयांच्या गांजाची खुलेआम विक्री केली जात आहे. या अंमली पदार्थ विक्री करणाऱ्याने लोणी काळभोर (ता. हवेली) येथे एम आय टी शैक्षणिक संकुलातील विद्यार्थ्यांना गांजा विक्री करून त्यांच्या मनामध्ये ‘संतोष’ निर्माण केला आहे. त्यामुळे विद्यार्थी व्यसनाधीन झाले आहेत. तर अष्टापुरे मळ्याच्या परिसरात एकजण पत्त्यांचा क्लब चालवीत आहे . या दोघांवर कारवाई कधी होईल. याकडे सर्वांचे लक्ष लागले आहे.
