पुणे : व्हॉट्सअॅप चॅटिंगमुळे देखील अनेकदा गुन्ह्याला आमंत्रण मिळते. शहरात नुकतीच अशीच एक धक्कादायक घटना उघडकीस आली आहे. “व्हॉट्सअॅप चॅटवर सतत का बोलत असतेस?” असा जाब विचारत, रागाच्या भरात पतीने दारूच्या नशेत पत्नीला गळफास देऊन जिवे मारण्याचा प्रयत्न केला.
याप्रकरणी पती विकी रमेश सोनवणे आणि सासरे रमेश तुकाराम सोनवणे यांच्याविरोधात सांगवी पोलीस ठाण्यात गुन्हा दाखल करण्यात आला आहे. याबाबत पोलिसांनी दिलेल्या माहितीनुसार, पत्नी नेहमी व्हॉट्सअॅपवर चॅटिंग करत असल्याने पती तिच्यावर संशय घेत होता. रागाच्या भरात एकदा पतीने पत्नीला जाब विचारला. “व्हॉट्सअॅप चॅटवर सतत का बोलत असतेस?” असा प्रश्न विचारून आरोपी पती विकी रमेश सोनवणे याने पत्नीच्या गळ्याला दोरीचा फास लावला. एवढ्यावरच न थांबता, सिलिंग फॅनला दोरी बांधून पत्नीला खुर्चीवर उभे केले आणि खुर्ची खाली ढकलून जीवे मारण्याचा प्रयत्न केला. या घटनेमुळे एकच खळबळ उडाली आहे.
दरम्यान, या घटनेनंतर घाबरलेल्या पत्नीने आरडाओरड करण्यास सुरवात केली. ओरडण्याचा आवाज ऐकून शेजाऱ्यांनी धाव घेतली आणि महिलेची सुटका केली. दरम्यान, गळ्याला फास बसल्यामुळे महिलेच्या गळ्याला गंभीर जखम झाली होती. महिलेवर सध्या अतिदक्षता विभागात उपचार सुरू आहेत. आरोपी विकी सोनवणे हा लष्करात कामाला असल्याची माहिती पोलिसांनी दिली.
दरम्यान, या घटनेप्रकरणी विकी सोनवणे आणि सासरे रमेश तुकाराम सोनवणे यांच्याविरोधात गुन्हा दाखल करण्यात आला आहे.
