केडगाव: देशासह राज्यातही दुसऱ्या पक्षातील नेत्यांचे भाजपमध्ये जोरदार ‘इन्कमिंग’ सुरू असून, त्यात दौंड तालुकाही मागे न राहता आमदार राहुल कुल यांच्या नेतृत्वाखाली दौंड तालुक्यातील इतर पक्षातील कार्यकर्ते हे भाजपमध्ये प्रवेश करत आहेत. त्यात गलांडवाडी गावचे नवनिर्वाचित सरपंच वैभव पासलकर यांनीही राष्ट्रवादीला सोडचिट्टी देत शेकडो कार्यकर्त्यांसह भाजपमध्ये प्रवेश केला.
मागील आठवड्यामध्ये सदस्यामधून सरपंचपदाची निवडणूक पार पडली होती. यामध्ये वैभव पासलकर हे विजयी होत सरपंचपदी विराजमान झाले होते. त्यांच्या या प्रवेशामुळे गलांडवाडी गावामध्ये राष्ट्रवादी काँग्रेसला मात्र मोठे खिंडार पडले आहे. या प्रवेशावेळी निळकंठ शितोळे, ज्ञानदेव कदम, उमेश देवकर, बाळासो भापकर, उत्तम खाडे, संदीप शितोळे, सुमित चव्हाण, श्रीकांत कदम यांच्यासह भाजपचे अनेक कार्यकर्ते मोठ्या संख्येने उपस्थित होते.
येत्या काळात आणखी प्रवेश होतील
दौंड तालुक्यातील अनेक नेते आमदार राहुल कुल यांच्या काम करण्याच्या पद्धतीमुळे प्रभावित होऊन स्वखुशीने भाजप पक्षात काम करण्यास इच्छुक आहे. कालांतराने अजूनही मोठमोठे प्रवेश आगामी काळात होतील. कारण आमदार राहुल कुल हे दूरदृष्टी असलेले नेते आहेत.
– उमेश देवकर, संघटक सरचिटणीस, भाजप, दौंड.
