पिंपरी : विवाह जुळविण्याच्या संकेतस्थळावरून ओळख झालेल्या एका तरुणाने लग्न करण्याचे आश्वासन देत पिंपरीतील एका महिलेची तब्बल दहा लाख रुपयांची आर्थिक फसवणूक केल्याची धक्कादायक घटना उघडकीस आली आहे. हा प्रकार 2023 पासून 19 ऑगस्ट 2025 या कालावधीत पिंपरी परिसरात घडला असून, याप्रकरणी पीडित महिलेने पिंपरी पोलीस ठाण्यात फिर्याद दिली आहे. त्यानुसार पोलिसांनी एका तरुणाविरोधात गुन्हा दाखल केला आहे.
पोलिसांनी दिलेल्या माहितीनुसार, आरोपी तरुणाची ओळख विवाह जुळविण्याच्या एका ऑनलाईन संकेतस्थळावरून फिर्यादी महिलेबरोबर झाली. दोघांमध्ये प्रथम मैत्री झाली आणि नंतर आरोपीने लग्नाचे आमिष दाखवत तिचा विश्वास संपादन केला. त्यानंतर आरोपीने आपल्या आई-वडिलांच्या गंभीर आजारपणाचे, तसेच वैयक्तिक आर्थिक अडचणींचे कारण पुढे करत फिर्यादीकडून वेळोवेळी मोठ्या रकमा उकळल्या.
या दरम्यान महिलेने आरोपीच्या विश्वासावर बँकेतून, क्रेडिट कार्डद्वारे आणि धनादेशाद्वारे एकूण 14 लाख 44 हजार 700 रुपये दिल्याचे तपासात समोर आले आहे. त्यातील केवळ 3 लाख 93 हजार 91 रुपये आरोपीने परत केले. मात्र उर्वरित 10 लाख 51 हजार 609 रुपये परत करण्यास आरोपीने नकार दिला. एवढेच नव्हे तर, त्याने फिर्यादीशी लग्न करण्यासही नकार देत तिची फसवणूक केली.
अचानक लग्न नाकारल्याने आणि मोठी रक्कम बुडाल्याने महिलेने पिंपरी पोलीस ठाण्यात तक्रार दाखल केली. त्यानुसार पोलिसांनी गुन्हा नोंदवून तपास सुरू केला आहे. या प्रकरणामुळे विवाह जुळविण्याच्या संकेतस्थळांवरून वाढणाऱ्या फसवणुकीच्या घटनांबाबत पुन्हा एकदा गंभीर प्रश्नचिन्ह निर्माण झाले आहे. सध्या पिंपरी पोलिसांकडून आरोपीचा शोध घेतला जात असून, संपूर्ण प्रकरणाचा तपास सुरू आहे.
