Pune crime: पुणे : पुण्याची ओळख शांत शहर म्हणून आहे. सध्या या शांत पुण्यात कायदा-सुव्यवस्थेचे तीन तेरा वाजले की काय अशी शंका येऊ लागली आहे. दिवाळी सणाच्या तोंडावर पुण्यातील प्रसिद्ध सराफ व्यावसायिकावर गोळीबार करण्यात आला आहे. शहरातील वानवडी भागातील बी. टी. कवडे रोडवर ही गोळीबाराची घटना घडली आहे. या घटनेत गोळ्या झाडण्यात आलेला सराफ व्यावसायिक गंभीर जखमी झाला आहे. गोळीबार करणाऱ्या व्यक्तींनी व्यावसायिकाकडील सोनं लुटून नेले असल्याची माहिती मिळत आहे.
टू व्हिलरवर वडिलांसोबत जाणाऱ्या सराफ व्यावसायिकावर 3 गोळ्या झाडल्या असून तो गंभीर जखमी झाला आहे. प्रतिक मदनलाल ओसवाल (वय 35) असे जखमी झालेल्या व्यक्तीचे नाव आहे. पोलिसांनी दिलेल्या माहितीनुसार, प्रतिक ओसवाल हे त्यांच्या वडिलांसोबत दुचाकीवरून निघाले होते. त्यावेळी क्रोमा मॉल चौकापासू बी. टी. कवडे रोड कडे जाणाऱ्या रस्त्यावर बुधवारी रात्री 9 वाजून 30 मिनिटांनी दुचाकीवरून आलेल्या 3 जणांनी प्रतिक ओसवाल यांच्यावर 3 गोळ्या झाडल्या. यावेळी प्रतिकच्या तोंडाला आणि मांडीत गोळी लागली आहे. यामध्ये प्रतीक गंभीर जखमी झाले आहेत. जखमी प्रतिक यांना रुग्णालयात दाखल करण्यात आले आहे. या गोळीबाराच्या घटनेनंतर वानवडी परिसरात एकच खळबळ उडाली असून भीतीचे वातावरण आहे.
सदर घटनेची माहिती मिळताच, पोलीस घटनास्थळी दाखल असून तपास सुरू केला आहे. दरम्यान, हा गोळीबार नेमका कोणी आणि कोणत्या कारणारून केला? हे मात्र समजू शकलेले नाही.
