पुण्यात अकरावी प्रवेशाची लगबग, चौथ्या फेरीचे वेळापत्रक बदलले; जाणून घ्या सविस्तर माहिती

पुणे: अकरावी प्रवेशाची वाट पाहणाऱ्या विद्यार्थ्यांसाठी महत्त्वाची बातमी आहे. माध्यमिक व उच्च माध्यमिक शिक्षण संचालनालयाने अकरावीच्या चौथ्या फेरीचे सुधारित वेळापत्रक जाहीर केले आहे. यानुसार, विद्यार्थ्यांना 1 आणि 2 ऑगस्टऐवजी आता 31 जुलै रोजी सकाळी 11 वाजल्यापासून ते 2 ऑगस्ट रोजी सायंकाळी 6 वाजेपर्यंत कनिष्ठ महाविद्यालयांमध्ये जाऊन आपला प्रवेश निश्चित करता येणार आहे. बदललेल्या वेळापत्रकामुळे विद्यार्थ्यांना प्रवेश घेण्यासाठी अधिक वेळ मिळेल. दरम्यान, वेळापत्रकानुसार, चौथी गुणवत्ता यादी लवकरच जाहीर केली जाणार असून सर्व महाविद्यालयांनी 11 ऑगस्टपूर्वी अकरावीचे वर्ग सुरू करणे आवश्यक आहे.

आतापर्यंत नियमित फेरी एक, दोन आणि तीनमध्ये एकूण 8 लाख 11 हजार 731 विद्यार्थ्यांनी कनिष्ठ महाविद्यालयात प्रवेश निश्चित केला आहे. एकूण 14 लाख 41 हजार 187 विद्यार्थ्यांनी अकरावी प्रवेशासाठी नोंदणी केली आहे. दरम्यान, नियमित चौथ्या फेरीसाठी 3 लाख 72 हजार 652 विद्यार्थ्यांनी पसंतीक्रम भरले आहेत. तसेच, 7 हजार 051 विद्यार्थ्यांनी नवीन नोंदणी केली आहे. कोटा अंतर्गत प्रवेशासाठी 13 हजार 829 विद्यार्थ्यांनी पसंतीक्रम भरले आहेत.