लोणी काळभोर : कुंजीरवाडी (ता. हवेली) येथील धुमाळ मळा परिसरात विद्युत मीटरमध्ये छेडछाड करून 2 लाख 30 हजारांहून अधिक रुपयांची वीजचोरी उघडकीस आणण्यास महाराष्ट्र राज्य विद्युत वितरण कंपनीच्या पथकाला यश आले आहे. लोणी काळभोर पोलीस ठाण्यात बाप-लेकावर गुन्हा दाखल करण्यात आला आहे.
काशिनाथ शंकर भोंडवे व शिवराम काशिनाथ भोंडवे (दोघेही रा. गट नं-389, धुमाळमळा कुंजीरवाडी ता. हवेली, जि. पुणे) अशी गुन्हा दाखल करण्यात आलेल्या बापलेकांची नावे आहेत. याप्रकरणी दिप्ती अनिल पाटील (वय. 44, रास्तापेठ, पुणे) यांनी लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी दिप्ती पाटील या महावितरणच्या मुळशी विभागातील भरारी पथकात उप कार्यकारी अभियंता या पदावर कार्यरत आहेत. वीज ग्राहकांच्या विद्युत संचाची तपासणी करून वीजचोरी आढळून आल्यास त्यांच्यावर कायदेशीर कारवाई करणे असे त्यांच्या कामाचे स्वरूप आहे.
दिप्ती पाटील त्यांच्या सहकारी सोनाली बावस्कर, वरिष्ठ तंत्रज शुकलाल जाधव यांचे भरारी पथक कुंजीरवाडी परिसरात विद्युत संचाची तपासणी करीत होते. तेव्हा काशिनाथ भोंडवे यांच्या मीटरचे सील तोडून छेडछाड केल्याचे आढळून आले. वीज मीटर उघडून पहिले असता, ग्राहकाने मीटरच्या सीटी सर्किटमध्ये रेझिस्टन्स बसवल्याचे आढळून आले.
दरम्यान, भोंडवे यांनी अनधिकृतपणे, अप्रामाणिकपणे स्वतःच्या आधिक फायद्यासाठी वीज मीटरमध्ये छेडछाड करून मागील 87 महिन्यात 13 हजार 26 युनिटची वीजचोरी केली आहे. त्यामुळे महावितरण कंपनीचे 2 लाख 28 हजार 921 रुपयांचे आर्थिक नुकसान झाले आहे. तसेच तडजोड देयक 6 हजार रुपये आज तागायत भरलेले नाही. याप्रकरणी दिप्ती पाटील यांनी लोणी काळभोर पोलीस ठाण्यात फिर्याद दिली आहे. त्यानुसार दोघांच्या विरोधात भारतीय विद्युत कायदा 2003 चे कलम 135 नुसार गुन्हा दाखल करण्यात आला आहे.
